ریاست بہار کے ضلع ارریہ کے رانی گنج بلاک کے دسٹوریا گاؤں میں دیر شب 11 ہزار وولٹیج تار گرنے سے تقریباً چھ مکانات جل کر راکھ ہوگئے۔
وہیں گھروں میں لگی آگ کو بجھانے کے دوران ایک باپ اور بیٹی کی جھلس جانے کی وجہ سے موت بھی ہوگئی، جس سے علاقے میں ماتم چھایا ہوا ہے۔
ہلاک ہونے والوں کی شناخت مقامی گاؤں کے 45 برس کے وشوناتھ سردار اور ان کی آٹھ برس کی بیٹی پوجا کماری کے طور پر ہوئی ہے۔
باپ اور بیٹی کی موت کی وجہ سے گاؤں میں سنسنی پھیل گئی ہے اور لوگ غم میں ڈوبے ہوئے ہیں۔
اس حادثے میں تقریباً 10 لاکھ روپے کے نقصان کا تخمینہ لگایا گیا ہے۔ سکرو سردار، وریندر سردار اور جگدیش سردار کی دکان آتشزدگی کے سبب خاک ہوئی ہے، جبکہ سریندر سردار، کیشن وتی دیوی اور سیکو سردار کے مکانات بھی جل گئے ہیں۔
متاثرہ سکرو سردار نے بتایا کہ اس کی پوتی کی شادی کے لیے رکھے گئے تین لاکھ نقد رقم اور ڈیڑھ لاکھ کے زیورات بھی جل گئے ہیں۔
واقعے کے بعد متوفی کے گھر پر لوگوں کا ہجوم جمع ہوگیا ہے۔ تاہم واقعے کے وقت گاؤں میں لوگ سو رہے تھے۔
اس سلسلے میں چند عینی شاہدین نے بتایا کہ دیر رات وشوناتھ سردار کے گھر کے سامنے بجلی کا تار گرگیا، تار ٹوٹتے ہی وشوناتھ کے گھر میں آگ لگ گئی۔
ادھر وشوناتھ آگ بجھانے کے لیے بالٹی میں پانی لے کر دوڑے، اسی دوران وشوناتھ 11 ہزار وولٹ کے تار کی زد میں آ گئے اور ان کی موت ہوگئی۔
اسی دوران وشوناتھ کی آٹھ برس کی بیٹی پوجا کماری اپنے والد کو بچانے کے لیے دوڑی اور وہ بھی کرنٹ اور آگ کے شعلوں کی زد میں آگئی، جس کی وجہ سے اس کی بھی موت ہوگئی۔
واضح رہے کہ پوجا کی موت ارریہ صدر ہسپتال لانے کے بعد ہوئی۔
بتایا جارہا ہے کہ آگ کے باعث دو گائیوں اور آدھی درجن بکریاں بھی مر گئی ہیں۔ واقعہ کے بعد رانی گنج تھانہ کے ایس ایچ او پولس اہلکار کے ساتھ کیمپ کیے ہوئے ہیں۔
