ریاست بہار، اڑیسہ، جھارکھنڈ اور بنگال کا سب سے بڑا دینی ادارہ امارت شرعیہ نے الیکشن کمیشن سے اپیل کرتے ہوئے کہا ہے کہ 'مئی میں رمضان کے پیش نظر گرم علاقوں میں مسلمانوں کو اپنی حق رائے دہی میں پریشانی ہوسکتی ہے اس لیے الیکشن کمیشن اپنے اس فیصلے پر غور وخوص کریں'۔
امارت شرعیہ کے ناظم انیس الرحمن قاسمی نے ای ٹی وی بھارت سے خصوصی ملاقات میں کہا کہ 'الیکشن کمیشن کو رمضان کے مہینے میں انتخابات کی تاریخوں پر غور کرنا چاہیے'۔
انہوں نے کہا کہ 'رمضان میں مسلمان روزہ رکھ کر مئی کی شدید گرمی میں پورے جوش اور حوصلے کے ساتھ اپنی رائے دہی کا استعمال کم کرے گی اس لیے الیکشن کمیشن کو چاہیے کہ یوپی بہار دہلی ہریانہ پنجاب جیسے علاقوں میں جہاں گرمی شدید پڑتی ہے ان علاقوں کی بہ نسبت جو کم گرمی والے علاقے ہیں وہاں انتخاب میں کوئی دشواری نہ آئے گی اس لیے الیکشن کمیشن کو چاہیے کہ ان گرمی والے علاقوں کی تاریخ پر غور کرے، تاریخ میں توسیع ممکن نہ ہو تو ان علاقوں میں گرمی سے پہلے انتخابات کرائے جائیں۔
مولانا انیس الرحمن قاسمی نے کہا کہ 'الیکشن کمیشن اگر چاہے تو تاریخ میں ردوبدل کرکے بہتر حق رائے دہی اور زیادہ سے زیادہ مسلمانوں کی انتخابات میں حصہ داری کو یقینی بنا سکتا ہے'۔
امارت شرعیہ بہار، جھارکھنڈ، اڑیسہ اور بنگال کا ایک بڑا دینی و ملی ادارہ ہے اس کی آواز ان ریاستوں میں سنی جاتی ہے۔
