ریاست بہار کے ضلع گیا میں دسہرہ ودرگاپوجا ہندومذہبی رسم ورواج کے تحت منایاجارہاہے۔ نوراتری کی آخری رات ہونے کی وجہ سے شہر میں لاکھوں کی بھیڑ ہے۔کئی مقامات پر ثقافتی پروگرام کا انعقاد کیا گیا، خاص طورسے ڈانڈیا کی دھوم شہر گیا میں ہے۔
سی آرپی ایف 159 بٹالین کے کیمپ میں ہی ڈانڈیا کا پروگرام ہوا۔ جس میں کمانڈنٹ بھی شریک ہوئے۔ تنظیموں کی جانب سے اسپتالوں میں پرساد (تبرک) تقسیم کیاگیا۔
سروجن کلیان و ایجوکیشنل ٹرسٹ کی جانب سے پربھاوتی اسپتال میں مریض اور ان کے رشتہ داروں سمیت اسپتال کے تمام اسٹاف کے درمیان تبرک تقسیم کیا گیا۔
ادھر درگاپوجا کے پیش نظر پورے شہراور اطراف میں سخت حفاظتی انتظامات کئے گئے ہیں، منچلوں پر پولیس کی خاص نگاہ ہے۔ جگہ جگہ پر پولیس جوانوں کی تعیناتی کی گئی ہے۔ ایس ایس پی راجیو مشرا سمیت اعلی افسران نے کئی مقامات پر پہنچ کر جائزہ بھی لیا ہے۔آج شام پانچ بجے راون کو گاندھی میدان میں جلایاجائے گا۔
