اسی ضمن میں ریاست بہار کے ارریہ میں آل انڈیا پیام انسانیت فورم نے آج شہر کے ٹول پلازہ سے متصل کشٹھ کالونی پہنچی اور ضرورت مندوں کے درمیان کمبل تقسیم کیا۔
اس کالونی میں لوگ ٹھنڈ سے متاثر ہورہے ہیں جن کی جانب نہ ضلع انتظامیہ کی توجہ ہے اور نہ کوئی عوامی نمائندہ ان کی خبرگیری کے لئے پہنچتا ہے۔ یہاں کے لوگ اس ٹھنڈ میں اپنی زندگی یونہی گزارنے پر مجبور ہیں۔
ایک طرف جہاں ٹھٹھرتی سردی سے لوگوں کی جان جا رہی ہے اور بہت سے لوگ آج بھی کھلے آسمان کے نیچے رات گزارنے پر مجبور ہے ایسے میں آل انڈیا پیام انسانیت فورم کا یہ قدم قابل ستائش ہے جو سماج کے غریب اور ضرورت مند لوگوں کے درمیان جا کر ان کی ضرورتوں کو پورا کر رہے ہیں۔ اس کالونی میں پیام انسانیت فورم کی جانب سے 70 لوگوں کے درمیان کمبل تقسیم کیا گیا۔ کمبل ملنے سے لوگوں کے چہروں پر خوشی تھی۔
پیام انسانیت کے سکریٹری مولانا مصور عالم ندوی نے اس موقع پر کہا کہ 'ہماری تنظیم کا مقصد ہی خدمت کرنا ہے، اس سے قبل بھی دیگر مواقع پر ہم کھڑے رہے ہیں اور آگے بھی اسی طرح کھڑے رہیں گے۔'
انہوں نے کہا کہ 'اس موسم میں جبکہ لوگ گھروں کے اندر ٹھنڈ سے کانپ رہے ہیں جن کے پاس گرم کپڑے یا کمبل نہیں ہے وہ اپنی زندگی کیسے گزار رہے ہیں ہمیں اس پہلو سے بھی سوچ کر ایسے لوگوں کی مدد کے لئے آگے آنا چاہئے۔'
فورم کے رکن دیوندر مشرا نے اس موقع پر کہا کہ 'آج لوگوں کے اندر سے سماج کے تئیں ذمہ داری کی فکر ختم ہو رہی ہے، سب اپنے اپنے مسائل میں مصروف ہے تو پھر ان غریبوں ان غریبوں کی فکر کون کریگا۔ اگر تھوڑا وقت بھی نکال کر ان کے بارے میں سوچا جائے تو اس کا پھل اوپر والا ہمیں ضرور دے گا۔
اس موقع پر فورم کی جانب سے اور لوگ بھی موجود تھے۔
