ریاست بہار کے ضلع گیا میں واقع 'بودھ گیا' میں بدھ کے روز دلائی لامہ مہابودھی کے مندر پہنچے اور مہاتما گوتم بودھ مندر کی زیارت و پوجا کی۔ مندر کے اندرونی حصے میں جاکر پوجا کرنے کے بعد انہوں نے مقدس مہابودھی کے درخت کو بھی دیکھا۔
دلائی لامہ نے ایک گھنٹہ سے زیادہ وقت تک مہابودھی کے مندر میں پوجا کی۔ انہوں نے مندر میں گوتم بدھ کے مجسمے کے سامنے منتر پڑھے اور دنیا کو عالمی امن کا پیغام دیا۔
مہابودھی کے مندر سے باہر نکلتے ہوئے صحافیوں سے بات کرتے ہوئے مذہبی رہنما نے کہا کہ 'بھارت میں تمام مذاہب کی ہم آہنگی کی روایت رہی ہے۔ یہاں سے بہت سے مذہب پیدا ہوئے ہیں۔ اس کے باوجود ایک دوسرے میں یکجہتی ہے۔ جو کسی بھی ملک میں نہیں ہے۔ تمام مذاہب کے مذہبی رہنماؤں کو اس روایت کو برقرار رکھنے کی ضرورت ہے۔'
بودھ مذہب کے روحانی پیشوا دلائی لامہ نے کہا ہے کہ 'ہمارے پاس حق اور سچائی کی طاقت ہے، جبکہ چینی کمیونسٹ کے پاس بندوق کی طاقت ہے۔'
دلائی لامہ نے کہا کہ 'عدم تشدد اور ہمدردی دنیا کی ضرورت بن گئی ہے۔ امن کی راہ پر گامزن ہو کر ہی امن اور ترقی کا تصور کیا جاسکتا ہے۔'
انہوں نے کہا کہ 'قدیم بھارت کا علم انتہائی مفید ہے۔ عدم تشدد اور ہمدردی کو دنیا اور بھارت کو بھی اپنا لینا چاہئے۔
انہوں نے کہا کہ 'جدید بھارت میں اس علم کو دوبارہ قائم کرنا ضروری ہے۔ ایک بار پھر اس علم کو بیدار کرنا انسانی ضرورت بن گیا ہے۔ تاکہ بھارت جدید تعلیم اور قدیم تعلیم کو ایک ساتھ لاسکے۔ اسے اندرونی سکون کی ضرورت ہے۔ ہندوستانی معاشرہ سیکولر ہے۔ پوری دنیا کو عدم تشدد اور ہمدردی کا راستہ اپنانا چاہئے۔
اس سے قبل مذہبی رہنما دلائی لامہ منگل کو ممبئی سے بودھ گیا پہنچے تھے جہاں روایتی انداز میں ان کا شاندار استقبال کیا گیا تھا۔ ضلع انتظامیہ کی جانب سے ڈی ایم ابھیشیک سنگھ اور ایس ایس پی راجیو مشرا نے گیا ایئرپورٹ پر ان کا استقبال کیا تھا۔
