بہار میں کونسل کے رکن سنیل کمار سنگھ کے بعد کورونا انفیکشن سے بدھ کی صبح مشہور معالج اور سمستی پور کے سول سرجن ڈاکٹر آر ۔ آر جھا کا پٹنہ کے آل انڈیا انسٹی چیوٹ آف میڈیکل سائنس (ایمس) میں انتقال ہوگیا۔ وہ قریب 63 سال کے تھے ۔
سرکاری ذرئع نے بتایا کہ دس دن قبل کورونا انفیکشن کی تصدیق کے بعد سرجن ڈاکٹر آر ۔ آر جھا کو پٹنہ ایمس میں داخل کرایا گیا تھا۔ لیکن آج صبح وہ کورونا کے خلاف جاری جنگ ہار گئے۔ ڈاکٹر جھا کے کنبہ میں اہلیہ مالاجھا، بیٹے ڈاکٹر سوربھ جھا اور کسلے جھا ہیں۔
ادھر ڈاکٹر جھا کے انتقال کی خبر ملتے ہی سمستی پور ضلع میں سوگ کی لہر دوڑ گئی ہے۔ ان کے انتقال پر مرکزی وزیر مملکت برائے داخلہ اور اجیا رپور کے بھارتیہ جنتا پارٹی (بی جے پی) رکن پارلیمنٹ نتیا نند رائے، سمستی پور کے لوک جن شکتی پارٹی رکن پارلیمنٹ پرنس راج، جنتادل یونائٹیڈ کے راجیہ سبھا رکن رام ناتھ ٹھاکر، منصوبہ اور ترقیات کے وزیر مہیشور ہزاری، سابق وزیر رام اشرے سہنی، مقامی راشٹریہ جنتادل رکن اسمبلی اختر الاسلام شاہین، انچارج سول سرجن ڈاکٹر ستیش کمار سنہا اور انڈین میڈیکل کونسل کے ضلع صدر ڈاکٹر آر این سنگھ سمیت مختلف تنظیموں نے گہرے رنج وغم کا اظہار کیا ہے۔ سبھی نے ڈاکٹر جھا کے انتقال کو ناقابل تلافی نقصان قرار دیا ہے۔
غور طلب ہے کہ دربھنگہ مقامی بلدیات سے بھارتیہ جنتاپارٹی (بی جے پی) کے رکن کونسل سنیل کمار سنگھ کا منگل کی شام پٹنہ کے ایمس میں انتقال ہو گیا تھا۔ کورونا پازیٹیو ہونے کے بعد انہیں ایمس میں داخل کرایا گیا تھا۔ بہار میں کسی سیاسی رہنما کی انفیکشن سے موت کا یہ پہلا واقعہ ہے۔
