ریاست بہار میں کھگڑیہ ضلع کے بلدور بلاک میں کل 11 افراد میں کورونا منفی پائے جانے کے بعد ہسپتال انتظامیہ نے انہیں چھٹی دے دی . اس کے بعد بلاک کے اعلی عہدیداروں نے سبھی کو ڈھول باجے کے ساتھ گھر کے لئے رخصت کیا ۔
اس دوران بلدور بلاک کے ائیسولیشن سے صحت یاب ہوکر گھر کے لئے رخصت ہوئے لوگوں نے بتایا کہ ڈھول باجے کے ساتھ رخصت ہونے کی خوشی کوئی دوسرا نہیں سمجھ سکتا، طویل عرصے سے قرنطینہ میں رہنے کے بعد جب ان کو پتہ چلا کہ ان کے نمونے منفی پائے گئے ہیں۔ تو ان کے خوشی کا کوئی ٹھکانہ نہیں تھا ۔
واضح رہے کہ گزشتہ دنوں ایک خاتون کورونا مثبت پائی گئی تھی۔ اس کے بعد خاتون کے رابطے میں آنے والے 11 افراد کو کورنٹائن کیا گیا تھا۔ اور تمام کے نمونے جانچ کے لئے بھیجے گئے تھے۔ جس میں سبھی کی رپورٹ آج منفی آئی ہے۔ اس کے بعد ہسپتال انتظامیہ نے سبھی کو گھر جانے کی اجازت دے دی ہے ۔
