بہار میں پہلے مرحلے کے تحت 28 اکتوبر کو ووٹنگ ہوگی اسی کے ایک دن قبل کانگریس کی عبوری صدر سونیا گاندھی نے ایک ویڈیو پیغام جاری کرکے رائے دہندگان سے عظیم اتحاد کو ووٹ دینے کی اپیل کی ہے۔
کانگریس صدر نے یہ بھی کہا ہے کہ 'دہلی۔بہار میں بندی سرکاریں ہیں، نوٹ بندی، تالا بندی، کاروبار بندی، معاشی بندی اور روزگار بندی ہے۔ اس لیے ایسی بندی سرکار کے خلاف اب بہار کی عوام تیار ہے اور اب بدلاؤ کا بیار ہے'۔
اس ویڈیو پیغام میں سونیا گاندھی نے مزید کہا کہ 'آج بہار میں اقتدار کے نشے میں چور حکومت اپنے راستے سے بھٹک گئی ہے، نہ ہی ان کی کتھنی اور نہ ہی ان کی کرنی اچھی ہے۔ مزدور، کسان، نوجوان پریشان اور مایوس ہے۔ معیشت کی نازک حالت لوگوں پر بھاری پڑرہی ہے'۔
تقریباً پانچ منٹ کے اس ویڈیو پیغام میں سونیا گاندھی نے کہا کہ 'بہار کے ہاتھوں میں ہنر ہے، طاقت ہے لیکن بے روزگاری کے سبب نقل مکانی اور مہنگائی نے ان کی آنکھوں میں آنسو اور پییروں میں چھالے دیے ہیں'۔
انھوں نے یہ بھی کہا کہ ڈر و خوف کی بنیاد پر پالیسیاں نہیں بنائی جاسکتی ہیں، بہار بھارت کا آئینہ ہے یہ بھارت کی شان اور فخر ہے۔
کانگریس صدر نے آگے کہا کہ 'بہار میں اب سوال بے روزگاری، کھیت کا تحفظ، صحت اور تعلیم ہے'۔
واضح رہے کہ خراب صحت کے باعث سونیا گاندھی بہار اسمبلی انتخابات میں عظیم اتحاد کے لیے انتخابی تشہیر کرنے سے قاصر ہیں، اس بار ان کے بیٹے راہل گاندھی نے مورچہ سنبھالا ہے۔
اس بار بہار اسمبلی انتخابات میں کانگریس عظیم اتحاد کا حصہ ہے اور وہ 70 سیٹوں پر اپنے امیدوار اتار رہی ہے۔
