ریاست بہار کے ضلع گیا میں شادی کی تقریب سے دلہن کے زیورات چوری ہونے کی خبر پھیلنے سے علاقے میں سنسنی پھیل گئی۔ گاڑی کے غائب ہونے کے بعد دلہا اور دلہن دونوں نے اطراف کے لوگوں سے خوب پوچھ تاچھ کی، تاہم گاڑی نہیں ملنے پر اس کی اطلاع پولیس کو دی گئی۔ شادی کی تقریب کسی طرح مکمل ہوگئی ہے۔
ضلع گیا ہیڈ کواٹر سے قریب 60 کلو میٹر کی دوری پر واقع انتہائی نکسل متاثر علاقہ باراڈیہ میں چوری کا واقعہ پیش آیا ہے۔
اطلاع کے مطابق مگدھ میڈیکل تھانہ حدود کے کاشی پورہ گاؤں کے سدیپ کمار ولد دنیش جی کے بیٹے وکاس کمار کی بارات باراچٹی کے برواڈیہ گاؤں کے نیپالی یادو کے گھر پہنچی تھی۔ سدیپ نے بودھ گیا سے ایک لگزری کار بک کی تھی۔
معلومات کے مطابق گاڑی کو مگدھ کالونی کا امیش مالاکر چلا رہا تھا۔ بارات میں پہنچنے کے بعد سدیپ نے ڈرائیور امیش کو بتایا کہ گاڑی میں زیورات اور کپڑے رکھے ہیں۔ اس کا خاص خیال رکھنا۔
دریں اثنا جب زیورات کی ضرورت پڑی تو پتہ چلا کہ جس گاڑی میں زیورات رکھے گئے تھے وہ گاڑی غائب ہے۔ جی پی ایس لوکیشن کی بنیاد پر گاڑی جی ٹی روڈ کے کاروائن کے قریب پٹرول پمپ کے قریب ہونے کی اطلاع ملی۔ جب دونوں طرف کے لوگ وہاں گئے تو کوئی سراغ نہیں ملا۔ کچھ دیر بعد پتہ چلا کہ ڈرائیور امیش چندی استھان کے ایک کلینک میں علاج کروا رہا ہے۔ ڈرائیور امیش کو پکڑ کر باراچٹی پولیس کے حوالے کر دیا گیا ہے۔
ڈرائیور نے پولیس کو بتایا کہ اسے کچھ لوگوں نے اغوا کیا تھا اور کاروائن کے قریب اسے چھوڑ دیا۔ پولیس انچارج کمار سوربھ نے فون پر بتایا کہ اس سلسلے میں ڈرائیور سے پوچھ تاچھ کی جا رہی ہے۔
