بی جے پی نے بہار میں تمام شہریوں کو کورونا ویکسن مفت میں دینے کا وعدہ کیا ہے جس پر اپوزیشن جماعتوں نے شدید تنقید کی ہے۔
مرکزی وزیر فینانس نرملا سیتارمن نے انتخابی منشور جاری کیا جس میں کہا گیا کہ ’جیسے ہی کوویڈ۔19 کی ویکسن تیار ہوگی، بہار میں ہر فرد کو مفت ویکسن دی جائے گی۔
اسی طرح تمل ناڈو میں بھی بی جے پی حلیف اے این اے ڈی ایم کے حکومت نے بھی کووڈ۔19 ویکسن ریاست کے تمام لوگوں کو مفت فراہم کرنے کا وعدہ کیا ہے جبکہ آئندہ سال تمل ناڈو میں انتخابات منعقد ہوں گے۔
کورونا وائرس ویکسن کی تیاری کےلیے بھارت سمیت دنیا کے مختلف ممالک میں بڑے پیمانہ پر تجربات کئے جارہے ہیں لیکن بہار میں پہلی بار کورونا ویکسن کو انتخابی وعدہ سے جوڑا گیا ہے۔
ویکسن کو انتخابی منشور میں شامل کرنے پر کانگریس کے سابق صدر راہل گاندھی نے طنز کرتے ہوئے کہا کہ ’بھارتی حکومت نے کوویڈ ویکسن کی فراہمی کا اعلان کیا، آپ کو ویکسن اور جھوٹے وعدہ کب ملیں گے یہ جاننے کےلیے براہ کرم اپنی ریاست میں ہونے والے انتخابات کی تواریخ سے آگاہی حاصل کریں‘۔
جموں و کشمیر کے سابق وزیراعلیٰ عمرعبداللہ نے بھی کورونا ویکسن کو انتخابی منشور میں شامل کرنے پر سخت تنقید کی۔ انہوں نے ٹوئٹ کیا کہ ’کیا بی جے پی اپنے خزانے سے ویکسن فراہم کرے گی؟ اگر یہ ویکسن سرکاری خزانہ سے فراہم کی جائے تو پھر بہار میں مفت کیسے دی جائے گی جبکہ باقی ملک میں اس کےلیے رقم ادا کرنی پڑے گی؟ کوویڈ خدشات کے بیچ انتخابی وعدہ شرمناک ہے‘۔
