ریاست بہار کے شہر گیا میں واقع شانتی باغ محلے میں گزشتہ 29 دنوں سے سنویدھان بچاو سنگھرش مورچہ کی جانب سے غیر معینہ مظاہرہ کیا جارہا ہے۔
26 جنوری 2020 بروز اتوار کو 71 ویں یوم جمہوریہ کے موقع پر ہزاروں کی تعداد میں لوگ شانتی باغ کے مظاہرے میں شامل ہوئے۔
اس مظاہرے میں بچے، بوڑھے، جوان، مرد وخواتین اور طلباء وطالبات سمیت سبھی طبقے کے معززین یہاں موجودہ رہے، صبح 11 بجے اسی سالہ نسیمہ خاتون (دادی) کے ہاتھوں رسم پرچم کشائی ادا کی گئی۔
اس موقع پر مظاہرین نے ملک اور آئین کو بچانے کا حلف بھی لیا اور پھر قومی ترانہ پڑھنے کے بعد ملک کے آئین کو پڑھ کر سنایا گیا۔
مظاہرے کے کنوینر عمیر خان عرف ٹکا خان نے بتایا کہ ضلع گیا کے دور دراز سے آج پرچم کشائی کی تقریب میں شامل ہونے کے لیے لوگ شامل ہوئے ہیں، آج یوم جمہوریہ کا جشن ہے اور اس جشن کے موقع پر مظاہرین نے آئین کو بچانے کاحلف اٹھا کر ملک کے آئین کو بچانے اور یہاں کی قومی یکجہتی وملک کی سالمیت کے لیے اپنے عزم کو دہرایا۔
