بہار کے وزیر اعلیٰ نتیش کمار، قائد حزب اختلاف تیجسوی یادو سمیت دیگر پارٹی کے رہنما، جو ملک میں ذات پر مبنی مردم شماری کے لیے مطالبہ کررہے ہیں، کے وفد نے آج وزیراعظم سے اس سلسلے میں ملاقات کی۔ جس کے بعد وفد پُرامید ہے کہ مرکزی حکومت کا فیصلہ ان کے حق میں آئے گا۔
نتیش کمار کی قیادت میں اسمبلی میں قائد حزب اختلاف تیجسوی یادو سمیت 10 سیاسی جماعتوں کے قائدین نے پیر کو ساؤتھ بلاک میں وزیر اعظم آفس میں مودی سے ملاقات کی۔
اس کے بعد کمار نے نامہ نگاروں کو بتایا کہ وفد نے وزیراعظم سے ذات پر مبنی مردم شماری کرانے کے حق میں تفصیل سے بات چیت کی۔ وزیر اعظم نے بھی ہر ایک کی بات بہت غور سے سنی۔ اس کے بعد ان کا کیا فیصلہ ہوتا ہے اس کا انتظار کیا جائے گا، لیکن انہوں نے ابھی تک اس سے انکار نہیں کیا۔
مزید پڑھیں:ذات پر مبنی مردم شماری سے وزیراعظم کیوں ڈر رہے ہیں: علی انور انصاری
کمار نے کہا کہ وفد کے تمام اراکین نے وزیراعظم پر زور دیا کہ وہ اس پر غور کریں اور فیصلہ کریں۔ انہوں نے کہا کہ ذات پر مبنی مردم شماری بہت اہم ہے۔ یہ ایک بار ہونا چاہیے۔ یہ سب کے مفاد میں ہے۔ ذات برادری پر مبنی مردم شماری 1931 میں کرائی گئی تھی اوریہ اعداد و شمار بہت پرانے ہو چکے ہیں۔ اس بار ذات برادری کی مردم شماری ہونے کے بعد صحیح اعداد و شمار سامنے آئیں گے اور اس کے بعد ان طبقات کے بارے میں اسکیمیں مناسب طریقے سے تیار کی جائیں گی جنہیں سرکاری منصوبوں کے مناسب فوائد نہیں مل رہے ہیں۔
یو این آئی
