ضلع بھاگلپور کے جملہ 7 حلقوں میں سے 5 حلقوں پر این ڈی اے نے قبضہ کرلیا جبکہ محض دو سیٹوں پر عظیم اتحاد کو کامیابی حاصل ہوئی۔ بھاگلپور کی کہلگاؤں سیٹ پر 45 سالوں سے کانگریس کا قبضہ تھا لیکن اس بار وہاں بی جے پی کا کمل کھل گیا ہے، جب کہ ناتھ نگر اسمبلی حلقہ میں 20 سالوں سے لگاتار جیت رہی جے ڈی یو کو آر جے ڈی کے ہاتھوں شکست کا منہ دیکھنا پڑا ہے۔ بھاگلپور شہر سے متصل اس یہ علاقہ کافی پچھڑا ہوا ہے اور نو منتخب رکن اسمبلی اشرف علی صدیقی نے وعدہ کیا ہے کہ وہ ترقیاتی کاموں پر توجہ دیں گے۔
ادھر بھاگلپور صدر سیٹ پر اس بار مقابلہ انتہائی کانٹے کا رہا، یہاں بی جے پی کے روہت پانڈے اور کانگریس کے اجیت شرما کے درمیان کانٹے کی ٹکر رہی جس میں کانگریس کے اجیت شرما کو محض 917 ووٹوں سے جیت حاصل ہوئی، اجیت شرما نے لگاتار تیسری بار جیت حاصل کی ہے۔ حالانکہ اقلیتی طبقہ کا ووٹر ان سے کافی ناراض بھی تھا لیکن ان کو ووٹ دینے کے سوا ان کے پاس کوئی چارہ نہیں تھا۔ جیت حاصل کرنے کے بعد اب وہ علاقے میں ترقیاتی کام تیز کرنے کا وعدہ کر رہے ہیں۔
سلطان گنج اسمبلی حلقہ سے جے ڈی یو کے للت نارائن منڈل نے کانگریس کے للن یادو کو شکست دے دی ہے، وہیں گوپال پور سے جے ڈی یو کے نریندر کمار نیرج عرف گوپال منڈل نے لگاتار چوتھی بار جیت حاصل کی ہے، بیہپور سے بی جے پی کے کمار شیلندر نے آر جے ڈی کے بولو مندل کو ہرا دیا ہے۔ اسی طرح پرپینتی اسمبلی حلقہ میں للن کمار نے آر جے ڈی کے للن پاسوان کو شکست دے دی ہے۔
