راجستھان: کوٹ پٹلی کے کیرت پور میں تین سالہ معصوم بچی کھیلتے ہوئے 150 فٹ گہرے بورویل میں گر گئی۔ لڑکی چیتنا کے بورویل میں گرنے کی خبر سنتے ہی آس پاس گاؤں والوں کی بھیڑ جمع ہوگئی۔ اس دوران پولیس اور انتظامیہ کے اہلکار بھی موقع پر پہنچ گئے ہیں۔ ڈی ایس پی راجیندر بردک نے کہا کہ معاملے کی اطلاع ملی ہے۔ پولیس، ایمبولینس، جے سی بی نے موقع پر پہنچ کر امدادی کارروائی شروع کردی ہے۔
کوٹ پٹلی کے ایس ڈی ایم برجیش چودھری نے بتایا کہ دو لڑکیاں ایک ساتھ کھیل رہی تھیں، جہاں معصوم بچی پاؤں پھسلنے کی وجہ سے تقریباً 150 فٹ بورویل میں گر گئی۔ جس کے بعد اہل خانہ نے پولیس انتظامیہ کو واقعہ کی اطلاع دی۔ لڑکی کو بچانے کے لیے این ڈی آر ایف اور ایس ڈی آر ایف کی ٹیمیں موقع پر پہنچ رہی ہیں۔ پولس اور انتظامیہ کے اہلکاروں نے بورویل کے اردگرد بیریکیڈنگ کی ہے۔ موقع پر ریسکیو آپریشن شروع کر دیا گیا ہے۔ مقامی لوگوں نے بتایا کہ جس بورویل میں لڑکی گری ہے وہ کچھ دن پہلے اس کے والد بھوپ سنگھ جاٹ نے بنوایا تھا۔
اس دوران ڈی وائی ایس پی راجیندر بردک اور سارند تھانہ انچارج محمد عمران ضلع ہیڈ کوارٹر سے موقع پر پہنچ گئے۔ اس کے علاوہ ریسکیو آپریشن کے لیے پولیس فورس، ایمبولینس اور جے سی بی مشین کو بھی تعینات کیا گیا ہے۔ بچی کو نکالنے کے لیے ریسکیو کام تیزی سے شروع کر دیا گیا ہے۔ انتظامیہ اور مقامی لوگ مل کر امدادی کاموں میں تعاون کر رہے ہیں۔
اس واقع سے علاقے میں سنسنی پھیل گئی ہے۔ لوگ بچی کی سلامتی کے لیے دعائیں کر رہے ہیں۔ بتادیں کہ چند روز قبل دوسہ میں بھی ایک معصوم بچہ بورویل میں گر گیا تھا۔ انتظامیہ بچے کو بچانے کے لیے جدوجہد کرتی رہی لیکن معصوم کو نہ بچایا جا سکا۔ حکومت اور مقامی انتظامیہ کی جانب سے کھلے بورویلوں کو ڈھانپنے کے لیے کئی احکامات جاری کیے گئے ہیں، لیکن زمینی سطح پر اس پر موثر کام کبھی نہیں ہوسکا۔
प्रदेश में जगह जगह खुले पड़े सूखे बोरवेल, सूखे कुंए लोगों के लिए खतरे का सबब बने हुए हैं।
— Rajasthan Police (@PoliceRajasthan) December 23, 2024
इन गड्ढों में गिरकर बच्चे ही नहीं बड़े भी गंभीर दुर्घटना का शिकार हो सकते हैं।
कहीं भी खुला बोरवेल या सूखा कुंआ दिखाई दे तो एसडीआरएफ हेल्पलाइन 0141-2759903 या 8764873114 पर सूचित करें।… pic.twitter.com/LmktYeSkEt
راجستھان پولیس نے اپنے آفیشل ایکس اکاؤنٹ پر ایک پوسٹ کیا ہے اور کھلے بورویلوں سے محتاط رہنے کی اپیل کی ہے۔ اس اپیل میں پولیس نے لکھا ہے کہ ریاست میں مختلف مقامات پر کھلے پڑے خشک بورویل اور خشک کنویں لوگوں کے لیے خطرے کا باعث ہیں۔ ان گڑھوں میں گر کر نہ صرف بچے بلکہ بڑے بھی سنگین حادثات کا شکار ہو سکتے ہیں۔ اگر آپ کو کہیں بھی کھلا بورویل یا خشک کنواں نظر آئے تو ایس ڈی آر ایف ہیلپ لائن 0141-2759903 یا 8764873114 پر اطلاع دیں۔
