ریاست بہار کے گیا شہر میں صبح نو بجے سے دکانوں پر تالے لگے ہوئے ہیں، غیر این ڈی اے پارٹی کے رہنما و کارکنان سڑک پر ہیں اور بھارت بند کے تحت شہر کو بند کرانے میں لگے ہوئے ہیں۔
دوپہر بارہ بجے تک سبھی بڑی دکانیں بند رہیں، حالانکہ اس دوران شہر میں ٹرافیک سسٹم کو 'پتر پکش میلہ' کے پیش نظر متاثر نہیں کیا گیا ہے، اس دوران گاندھی میدان سے راشٹریہ جنتادل کے رکن اسمبلی منجو اگروال اور گروا رکن اسمبلی اجے یادو کی قیادت میں سینکڑوں لوگوں نے جلوس نکالا۔
ساتھ ہی اَزاد پارک سے بائیں بازو کی جماعتوں سمیت کانگریس کی طرف سے جلوس نکالا گیا۔ کلکٹریٹ کے پاس جلوس پہنچ کر دھرنا میں تبدیل ہوگیا اور یہاں پر مرکزی و ریاستی حکومت کے خلاف نعرے بازی بھی کی گئی۔
یہ بھی پڑھیں: Bharat Bandh: ملک بھر میں بھارت بند کا ملا جلا اثر
اس دوران رہنماؤں نے مطالبہ کیا کہ مرکزی حکومت فوری طور پر زرعی قوانین کو واپس لے۔ کسانوں کے معاملے کو سنجیدگی سے لیتے ہوئے حکومت ٹھوس فیصلے پر پہنچے تاکہ اب تک کہ طویل احتجاج کو ختم کیا جاسکے۔
واضح رہے کہ ضلع گیا میں صبح سے ہی بندی کا اثر ہے حالانکہ گزشتہ شام کو سبھی پارٹیوں کی طرف سے کہا گیا تھا کہ شہر کو بند سے الگ رکھا گیا ہے تاہم صبح میں اعلان کا اثر نہیں ہوا۔
