پٹنہ کے گاندھی میدان پولیس اسٹیشن میں 18 نامزد اور 500 نامعلوم افراد، جن میں حزب اختلاف کے رہنما تیجسوی یادو بھی شامل ہیں، کے خلاف دارالحکومت کے گاندھی میدان میں کسانوں کی حمایت میں بلا اجازت مظاہرہ کرنے پر مقدمہ درج کیا گیا ہے۔ وہ ہفتے کے روز اپنے حامیوں سمیت گاندھی میدان میں دھرنا دے رہے تھے۔
ہفتہ کے روز تیجسوی یادو اپنے حامیوں کے ساتھ دہلی میں جاری کسانوں کی تحریک کی حمایت میں گاندھی میدان پٹنہ میں مہاتما گاندھی کے مجسمے کے قریب مظاہرہ کررہے تھے۔ ضلع انتظامیہ کی جانب سے انہیں اس کی اجازت نہیں ملی تھی۔ انتظامیہ نے انہیں روکنے کے لئے گاندھی میدان کو بھی سیل کردیا۔ تاہم آر جے ڈی کی جانب سے پہلے سے اعلان شدہ مظاہرہ کو متعین وقت اور تاریخ پر کیا گیا۔
