دہلی سے پٹنہ لوٹنے کے درمیان اتر پردیش میں صحافیوں سے گفتگو کرتے ہوئے انہوں نے کہا کہ 'چراغ پاسوان ابھی نوجوان ہیں، ان میں سیاسی بصیرت اور مستقبل کے کئی عزائم ہیں۔ تیجسوی یادو بھی چراغ پاسوان کے ہم عمر ہیں، اگر دونوں ایک ساتھ آ جائیں تو فرقہ پرست طاقتوں کو جڑ سے اکھاڑ پھینکیں گے۔
لالو پرساد یادو کے اس بیان پر آر جے ڈی یوتھ ونگ کے ریاستی صدر قاری محمد صہیب نے کہا کہ صرف چراغ پاسوان ہی نہیں بلکہ تمام اپوزیشن پارٹیوں کو متحد ہوکر ایک پلیٹ فارم پر آنا چاہیے۔
انہوں نے کہا کہ آج بہار حکومت ہر محاذ پر ناکام اور فیل ثابت ہو رہی ہے۔ مہنگائی، بیروزگاری، غریبی، جرائم اور لوٹ مار میں بے تحاشہ اضافہ ہوا ہے۔ جس پارٹی کے ساتھ نتیش کمار ہیں وہ فرقہ پرست پارٹی ہے، آپسی بھائی چارہ اور محبت کا گلا گھونٹنا چاہتی ہے۔ اس لیے آج بھی تمام پارٹیاں متحد ہو جائیں تو فرقہ پرست پارٹیوں کو شکست دی جاسکتی ہے۔
قاری صہیب نے مزید کہا کہ 'لالو جی اب پہلے سے بہتر اور تیزی کے ساتھ صحتیاب ہو رہے ہیں۔ بہار کے عوام لالو جی کے لیے دعا کر رہی تھی ہم ان تمام لوگوں کے شکر گزار ہیں۔
