بارہمولہ: لشکر طیبہ کے دو معاون گرفتار

پولیس نے بتایا کہ دونوں ملزمین نے یہ اعتراف کیا ہے کہ وہ عسکریت پسندوں کی صف میں شامل ہونا چاہتے ہیں، لیکن اس سے قبل انہیں سوپور میں سکیورٹی فورسز کے کسی بھی ادارے پر گرنیڈ پھینکنے کی ہدایت دی گئی تھی۔

شمالی کشمیر کے ضلع بارہمولہ میں سوپور پولیس نے گرنیڈ حملہ میں کارروائی کرتے ہوئے آج لشکر طیبہ کے دو معاون کو گرفتار کیا ہے۔

پولیس نے تفتیش کے دوران 02 ملزمان جن کی شناخت محمد آصف نجار ولد مشتاق احمد نجار ساکنہ نور باغ سوپور اور ساحل راشد بٹ ولد راشد بٹ ساکنہ گرین ٹاؤن سوپور، کو گرفتار کیا ہے اور پولیس کے مطابق دوران تفتیش انہوں نے اعتراف کیا کہ وہ لشکر طیبہ کے لیے کام کر رہے ہیں۔

پولیس نے بتایا 'دونوں نے یہ اعتراف کیا ہے کہ وہ عسکریت پسندوں کی صفوں میں شامل ہونا چاہتے ہیں لیکن اس سے قبل انہیں سوپور میں سکیورٹی فورسز کے کسی بھی ادارے پر گرنیڈ پھینکنے کی ہدایت دی گئی تھی'۔

واضح رہے کہ سوپور میں یکم اپریل کو 12 بج کر 18 منٹ پر نامعلوم عسکریت پسندوں نے پولیس پوسٹ بس اسٹینڈ کی طرف ہینڈ گرنیڈ پھینکا۔ جو نشانے سے چوک گیا اور سڑک کے کنارے پھٹا۔ نتیجے میں 03 مقامی زخمی ہوگئے۔