شمالی کشمیر کے ضلع بارہمولہ میں قائم فوج کی 19 ویں انفنٹری ڈویژن کے جی او سی میجر جنرل وریندرا وٹس نے کہا کہ اگرچہ لائن آف کنٹرول پر سرحد پار سے دراندازی کی کوششیں ہونا کوئی نئی بات نہیں ہے تاہم رواں برس فوج کی مستعدی کے نتیجے میں ان پر کافی حد تک قابو پایا گیا ہے۔
انہوں نے ایک تقریب کے حاشیے پر نامہ نگاروں کے سوالات کا جواب دیتے ہوئے کہا: 'لائن آف کنٹرول پر سرحد پار سے دراندازی کی کوششیں ہونا کوئی نئی بات نہیں ہے۔ لیکن فوج اپنی ڈیوٹی پوری مستعدی سے انجام دے رہی ہے۔ اس برس ہم نے دراندازی پر کافی حد تک قابو پایا ہے۔ ہوسکتا ہے کہ چھوٹے گروپس میں دراندازی ہوئی ہو'۔
ان کا مزید کہنا تھا: 'ہم اپنا کام کرنے کی حکمت عملی کو ضرورت کے حساب سے بدلتے رہتے ہیں۔ لیکن پاکستان کی طرف سے دراندازی کرانے کی کوششیں مسلسل جاری ہیں۔ کمی ہماری مستعدی کی وجہ سے آئی ہے۔ پاکستان چاہتا ہے کہ زیادہ سے زیادہ دراندازی ہو تاکہ یہاں حالات خراب کئے جائیں'۔
