شمالی کشمیر کے ضلع بانڈی پورہ میں پولیس نے دو عسکری معاونین کو گرفتار کرنے کا دعویٰ کیا ہے۔ اس سلسلے میں ایس ایس پی راہل ملک نے آج ایک پریس کانفرنس کی جس میں انہوں نے معاملے کی تفصیلات فراہم کیں۔
انہوں نے کہا کہ پولیس کو کافی عرصے سے اطلاع موصول ہورہی تھی کہ کچھ لوگ شمالی کشمیر میں نوجوانوں کو عسکری صف میں شامل کرنے کی کوشش کر رہے ہیں۔ اس سلسلے میں پولیس نے لیڈ فالو (اطلاع پر عمل) کرتے ہوئے عبدالمجید خان نام کے او جی ڈبلیو (اعلی سطح کے ورکر) کو گرفتار کیا۔ پولیس کے مطابق ملزم ماضی میں عسکریت پسند بھی رہ چکا ہے۔ اس کا تعلق کرالہ پورہ علاقے سے ہے۔
ایس ایس پی بانڈی پورہ راہل ملک نے کہا کہ 'تفتیش کے بعد سوپور سے ایک اور ملزم کو گرفتار کیا گیا جس کا نام شوکت احمد ہے اور وہ سنگرامہ سوپور سے تعلق رکھتا ہے۔ گزشتہ دنوں اس کی دکان سے آٹھ ہینڈ گرینیڈ، دو پستول اور گولیوں کے دس راؤنڈ برآمد ہوئے تھے۔'
انہوں نے کہا کہ عبدالمجید ایک ہارڈ کور (کٹر) اپر گراونڈ ورکر (عسکری معاون) ہے جو کافی عرصے سے سرگرم ہے۔
پولیس کے مطابق دونوں ملزم عسکریت پسندوں کو رسد اور ہتھیار فراہم کرتے تھے اور ان کے ذمہ شمالی کشمیر میں نوجوانوں کو عسکری سرگرمیوں کی طرف مائل کرنا تھا۔
پولیس کے مطابق اس سلسلہ میں کیس درج کر لیا گیا ہے اور مزید تحقیقات جاری ہیں۔
