شمالی کشمیر کے ضلع بانڈی پورہ میں ایک مقامی غیر سرکاری تنظیم ’حیدر اسپورٹس اکیڈمی‘ اور متعدد سماجی کارکنان نے پہاڑی علاقہ بوٹھو میں کورونا وائرس سے متعلق عوام کو آگہی فراہم کرنے کے علاوہ قوت مدافعت بڑھانے والی ادویات مفت تقسیم کیں۔
اس کے علاوہ ماسک اور سینیٹائرز بھی تقسیم کیے گئے۔
مقامی باشندوں نے غیر سرکاری تنظیم اور رضاکاروں کی اس کاوش کی سراہنا کرتے ہوئے کہا کہ بوٹھو ایک پسماندہ اور پہاڑی علاقہ ہونے کے سبب انہیں لاک ڈائون کے دوران کئی دقتوں کا سامنا کرنا پڑ رہا ہے۔ انہوں نے کہا ’’سر درد کی گولی حاصل کرنے کے لیے بھی انہیں ضلع اسپتال کا رخ کرنا پڑتا ہے۔‘‘
رضاکاروں نے میڈیا سے گفتگو کرتے ہوئے کہا کہ بوٹھو علاقے میں ادویات کی قلت کے حوالے سے انہیں کئی شکایات موصول ہونے کے بعد انہوں نے اس علاقے کا رخ کیا اور عوام کو کورونا سے متعلق آگہی فراہم کرنے کے علاوہ مختلف ادویات مفت تقسیم کیں۔
