بانڈی پورہ: باغات میں بارش کا پانی جمع، کسان پریشان

شمالی کشمیر کے ضلع بانڈی پورہ کے وجپارہ علاقے میں حالیہ بارشوں کی وجہ سے سیلابی صورتحال پیدا ہوگئی ہیں۔

وادی میں بارشوں کے باعث جہاں پہاڑی علاقوں میں زمین کھسکنے کے واقعات رونما ہو رہے ہیں وہیں، نشیبی علاقوں میں سڑکیں زیر آب ہو گئی ہیں۔ علاوہ ازیں کھیتوں اور باغات میں بھی پانی جمع ہو گیا ہے۔

ضلع بانڈی پورہ کے وجپارہ علاقے میں کسانوں نے انتظامیہ کو تنقید کا نشانہ بناتے ہوئے کہا کہ ناقص ڈرینیج نظام کے باعث علاقے کے کھیتوں اور باغات میں پانی جمع ہو چکا ہے جس کی نکاسی کا کوئی معقول انتظام نہیں ہے۔

انہوں نے کہا کہ علاقے کے باغات مکمل طور پر بارشوں کی پانی سے بھرے پڑے ہیں جس کی وجہ سے باغات کو شدید خطرہ لاحق ہے۔

کسانوں کا کہنا ہے کہ باغات میں تقریباً ایک فٹ تک پانی جمع ہوگیا ہے جس سے سیب کے درختوں کو شدید نقصان ہو رہا ہے۔