جشنو دیو ورما نے میڈیا سے بات کرتے ہوئے بتایا کہ تریپورہ کے ثقافتی ورثے اور شان کو داغدار کرنے کی کوشش کی جارہی ہے جو قابل مذمت ہے۔ انہوں نے کہا کہ کچھ لوگ جھوٹی خبریں اور ویڈیوز کے ذریعہ سیاست کررہے ہیں۔ ریاستی حکومت اس طرح کے پروپگنڈے کو برداشت نہیں کرے گی۔
انہوں نے کہا کہ اشتعال انگیزی کے ذریعہ تریپورہ کو ملک میں بدنام کرنے کی کوشش کی جارہی ہے۔ ریاستی حکومت ایسی کسی حرکت کو کامیاب ہونے نہیں دے گی۔ نائب وزیراعلیٰ نے دعویٰ کرتے ہوئے کہا کہ تریپورہ میں کبھی بھی کوئی فرقہ وارانہ فسادات نہیں ہوئے جب کہ یہاں لوگ پُرامن طریقے سے مل جل کر رہتے ہیں جو ہماری شان کو ظاہر کرتا ہے۔
نائب وزیراعلیٰ نے کہا کہ دیگر جماعتوں کی جانب سے کی جانی والی تنقیدوں کا ہم خیرمقدم کرتے ہیں تاہم انہوں نے اس طرح کی حرکت کو سازش قرار دیا۔ انہوں نے کہا کہ ’مہاراشٹرا میں تریپورہ کا نام استعمال کرتے ہوئے جو واقعات رونما ہوئے ہیں وہ ہمارے لیے شرمناک ہیں‘
انہوں نے کہا کہ سیاسی فائدہ کے لیے فرضی تصاویر اور خبروں کو پھیلایا جارہا ہے اور تریپورہ کی شبیہ کو خراب کرنے کی کوشش کی جارہی ہے۔
