جنوبی کشمیر کے ضلع اننت ناگ میں شہری علاقوں خاص کر، جنگلات منڈی، پشو محلہ، نازک محلہ، قاضی محلہ سمیت دیگر دیہی علاقوں میں بھی غیر ضروری بجلی کٹوتی کا سلسلہ گزشتہ کئی روز سے جاری ہے۔
بجلی کی آنکھ مچولی سے لوگوں کو آئے روز مشکلات کا سامنا کرنا پڑ رہا ہے۔
محکمہ پی ڈی ڈی کی ناقص کار کردگی پر لوگوں کی جانب سے متعلقہ محکمہ کے تئیں ناراضگی کا اظہار کیا جا رہا ہے۔ ان کا کہنا ہے کہ سردیوں کے ایام شروع ہوتے ہی وادی میں بجلی کی غیر ضروری کٹوتی یہاں کا معمول بن چکا ہے۔
مقامی لوگوں نے محکمہ بجلی پر الزام عائد کرتے ہوئے کہا کہ محکمہ یہاں کے شہریوں کو بجلی کی معقول سپلائی بحال کرنے میں ناکام ہو چکا ہے۔
لوگوں کا کہنا ہے کہ بجلی کی آنکھ مچولی سے نہ صرف یہاں کا کاروباری طبقہ متاثر ہو رہا ہے بلکہ طلبہ کی پڑھائی پر منفی اثرات مرتب ہو رہے ہیں۔
ای ٹی وی بھارت کے ساتھ بات کرتے ہوئے مقامی لوگوں نے دعویٰ کیا کہ وہ وقت پر بجلی بلوں کی ادائیگی کرتے ہیں تاہم اس کے باوجود انہیں شیڈول کے مطابق بجلی فراہم نہیں کی جارہی ہے۔
انہوں نے متعلقہ محکمہ سے بجلی نظام کو درست کرنے اور برقی رو کی معقول سپلائی کو یقینی بنانے کا پر زور مطالبہ کیا تاکہ آنے والے وقت میں انہیں مزید دقتوں کا سامنا نہ کرنا پڑے۔
