کووڈ 19 کے سبب نافذ ہوئے لاک ڈاون میں نرمی ملتے ہی مقامی و غیر مقامی سیاحوں نے وادیٔ کشمیر کے قدرتی حسن سے لطف اندوز ہونے کے لئے یہاں کے صحت افزا مقامات پر جانا شروع کیا ہے جس کی وجہ سے یہاں کے مغل باغات اور سیاحتی مقامات tourist places میں دوبارہ رونق لوٹتی نظر آرہی ہے۔
ان دنوں وادی کے مختلف دلکش مقامات، خاص کر پہلگام، اہربل، اچھہ بل، کوکرناگ اور مغل باغات میں لوگوں کی چہل پہل دیکھنے کو مل رہی ہے جہاں لوگ اپنے رشتہ داروں، دوست و احباب کے ہمراہ ان حسین مقامات پر پُر سکون لمحات کا مزہ لے رہے ہیں۔
وہیں بچے اور نوجوان یہاں کے ٹھنڈے اور صاف و شفاف قدرتی چشموں اور جھرنوں میں ڈُبکیاں لگا کر اپنے جسم و ذہن کو تروتازہ کرتے ہیں۔
ای ٹی وی بھارت سے بات کرتے ہوئے سیاحوں نے کہا کہ وہ گزشتہ تقریبا تین برسوں سے اپنے گھروں میں محصور ہو کر رہ گئے تھے جس کی وجہ سے وہ ذہنی کوفت کا شکار ہوئے تھے۔
تاہم لمبے عرصے کے بعد پُر فضا ہواؤں میں سانس لینے کا موقعہ ملنے سے انہیں سکون و راحت محسوس ہو رہی ہے۔
انہوں نے سرکار کے اس قدم کا خیر مقدم کیا اور نیک خواہشات کا اظہار کرتے ہوئے کہا کہ ہمیں ہر حال میں کووڈ ایس او پیز کی پاسداری کو یقینی بنانا چاہئے تاکہ سماج کو تیسری لہر کا سامنا نہیں کرنا پڑے۔
وہیں سیاحت سے روزی روٹی کمانے والے افراد بھی سیاحتی سرگرمیاں بحال ہونے پر مسرت کا اظہار کر رہے ہیں۔
ان کا کہنا ہے کہ گزشتہ تین برسوں سے کاروباری سرگرمیاں متاثر رہنے سے وہ مالی مشکلات کا سامنا کر رہے ہیں۔ تاہم معمولات زندگی پٹری پر لوٹنے کے بعد ان کی امیدیں جاگ گئی ہیں۔
مزید پڑھیں:
لاک ڈاؤن کو روزگار کا موقع بنانے والی خاتون
بہتر حالات سماج کے ہر فرد کو آزادانہ طریقہ سے زندگی کے لمحات گزارنے کا موقعہ فراہم کرتے ہیں۔ تاہم سماج کے ہر فرد پر یہ ذمہ داری عائد ہوتی ہے کہ وہ نظم و ضبط اور اصولوں کی پاسداری کو یقینی بنائیں۔
