بھارتی کرکٹ ٹیم کے مشہور کھلاڑی سریش رینا نے کشمیر میں نوجوان کھلاڑیوں کو بہترین تربیت دینے کے لیے ایک مہم کا آغاز کیا ہے، جس کے تحت کشمیر میں کرکٹ سے وابستہ نوجوانوں کو بہترین تربیت فراہم کی جائے گی۔
اسی ضمن میں جموں و کشمیر کے ضلع اننت ناگ کے ڈورو کرکٹ میدان میں سریش رینا نے ویری ناگ کے متعدد نوجوان کھلاڑیوں کو تربیت دینے کے لیے منتخب کیا ہے، منتخب کیے گئے نوجوان کھلاڑیوں کی صلاحیت کو مزید تراشنے کے لیے سریش رینا کرکٹ اکیڈمی روانہ کیا جائے گا۔
ویری ناگ علاقے کے کرکٹ کھلاڑیوں نے سریش رینا کی اس کاوش کو کافی سراہا اور امید جتائی ہے کہ مستقبل میں بھی اس طرح کے اقدامات اٹھائے جائیں گے۔
واضح رہے کہ جموں و کشمیر میں کھیل کو فروغ دینے کے لیے سریش رینا نے جموں و کشمیر پولیس کے ڈائریکٹر جنرل دلباغ سنگھ اور اننت ناگ کے سینیئر سپرنٹنڈنٹ آف پولیس سندیپ سنگھ کو ایک خط لکھا تھا۔
خط میں رینا نے لکھا تھا کہ "میں بڑی اُمید کے ساتھ آپ کے سامنے اپنی خواہش ظاہر کر رہا ہوں، میں چاہتا ہوں کہ جموں کشمیر کے پسماندہ بچوں کو کرکٹ میں شاندار کارکردگی کا مظاہرہ کرنے کا موقع ملے، اس لیے میں چاہتا ہوں کہ میں وہاں آکر کرکٹ کو فروغ دو۔"
ان کا مزید کہنا تھا کہ "میں چاہتا ہوں کہ کھیل کو گاؤں کے اسکولوں اور کالجوں میں فروغ ملے، میرا بس ایک ہی مقصد ہے کہ جموں کشمیر کے ہونہار کھلاڑیوں کو اپنے ہنر کو بہتر کرنے کی صحیح تربیت ملے۔"
