وادی کے مختلف علاقوں کے ساتھ ساتھ جنوبی ضلع اننت ناگ کے حلقہ انتخاب بجبہاڑہ کے متعدد علاقوں میں شدید ژالہ باری کی وجہ سے باغ مالکان کو کافی نقصان ہوا ہے۔
باغ مالکان کا کہنا ہے کہ تقریباً آدھے گھنٹے تک زور دار ژالہ باری ہوئی ہے، جس کے سبب سیب کے باغیچوں میں درختوں سے نکلے ہوئے شگوفے نیچے گر گئے اور باغات میں متعدد دفعہ دوا کا چھڑکاؤ کیا گیا تھا۔ لیکن شدید ژالہ باری کی وجہ سے سب بے سود ہوگیا۔ جبکہ اس صنعت سے وابستہ افراد کو لاکھوں کے نقصان سے دوچار ہونا پڑا۔
باغ مالکان نے مزید کہا کہ حالیہ ژالہ باری کے نتیجے میں ان کی فصل کو کافی نقصان پہنچا ہے، علاقے میں ژالہ باری اس قدر ہوئی ہے کہ علاقے میں جیسے برف کی چادر بچھادی گئی۔
انہوں نے محکمہ باغبانی سے مطالبہ کیا ہے کہ وہ نقصان کا تخمینہ لگا کر باغ مالکان کو مالی امداد فراہم کریں تاکہ باغ مالکان کو کچھ حد تک نقصان کی تلافی ہو سکے۔
