ضلع ترقیاتی کمشنر اننت ناگ، ڈاکٹر پیوش سنگلا نے کہا کہ انتظامیہ کی کاوشوں اور عوام کے تعاون سے کووڈ 19 کی صورتحال کو قابو میں کیا گیا ہے۔ وبائی صورتحال میں نمایاں بہتری دیکھنے کو مل رہی ہے، جو ایک خوش آئند بات ہے۔
ڈی سی ڈاکٹر پیوش سنگلا نے یہ باتیں کووڈ 19 کے منظر نامے اور اس کی دوسری لہر کی وجہ سے پیدا ہونے والے صورتحال سے نمٹنے کے لئے ضلع کی جانب سے اٹھائے جانے والے اقدامات کے بارے میں میڈیا سے خطاب کرتے ہوئے کہی۔ عوام کو چاہیے کہ وہ افواہوں پر دھیان نہ دیں اور فوری طور پر خود کو ویکسین لگوائیں۔ کووڈ ریکوری کی شرح 98 فیصد سے تجاوز کر گئی ہے جبکہ ایک ہفتہ کے اندر مثبت مریضوں کی شرح 0.3 فیصد رہی ہے۔
مزید پڑھیں: ادھمپور: مہنگائی کے خلاگ کانگریس کارکنان کا احتجاج
ویکسینیشن کے اعداد و شمار کے بارے میں بتاتے ہوئے ڈی سی نے کہا کہ اب تک مختلف طبقوں سے 3 لاکھ 62 ہزار سے زائد افراد کو کووڈ مخالف ویکسین دی گئی ہے جبکہ دیگر افراد کو ویکسینیٹ کرانے کا سلسلہ زوروں پر جاری ہے۔
