تجاوزات کے خلاف انہدامی کارروائی

اننت ناگ میں میونسپل کونسل کے ذریعہ متعدد ناجائز ڈھانچوں کو ہٹایا گیا ہے۔

جموں و کشمیر کے ضلع اننت ناگ کے ریشی بازار، ڈانگر پورہ و قصبہ کے دیگر کئی مقامات پر میونسپل کونسل کی جانب سے ناجائز تجاوزات کے خلاف آج مہم چلائی گئی۔
کاروائی کے دوران مذکورہ مقامات پر ناجائز تعمیرات کو منہدم کیا گیا۔ مہم کی قیادت اننت ناگ میونسپل کونسل کے چیئرمین ہلال احمد شاہ کر رہے تھے۔ ان کے ہمراہ اننت ناگ میونسپل کمیٹی کے ایگزیکٹو افسر یاسر احمد بھی موجود تھے۔

ہلال احمد شاہ کے مطابق چند خود غرض عناصر نے کورونا وائرس کی وجہ سے نافذ لاک ڈاون کا ناجائز فائدہ اٹھاتے ہوئے دکانوں اور اپنے گھروں کے باہر غیر قانونی طریقے سے تعمیرات کھڑے کئے تھے، جس کے خلاف فوری کارروائی کرتے ہوئے اسے ہٹا دیا گیا ہے۔ انہوں نے کہا کہ لاک ڈاؤن کے دوران غیر قانونی قبضہ کرنے والوں کے خلاف کارروائی جاری رہے گی۔