بجبہاڑہ بس اسٹینڈ کی برسوں بعد میگڈمائزیشن سے عوام میں خوشی

جموں و کشمیر کی انتظامیہ نے تعمیراتی کاموں میں مزید سرعت لاتے ہوئے اور لوگوں کو بنیادی سہولیات پہنچانے کی غرض سے تعمیراتی کاموں خصوصاً سڑکوں کی تعمیر و کشادگی پر ہزاروں کروڑ روپے صرف کیے جا رہے ہیں۔

ضلع اننت ناگ کے بجبہاڑہ علاقے میں میونسپل کمیٹی اور محکمہ تعمیرات عامہ کے دست تعاون سے برسوں بعد بجبہاڑہ کے مین مارکیٹ میں قائم بس اسٹینڈ کی مگڈمائزیشن کا کام شروع کیا گیا ہے۔

میگڈمائزیشن کا کام شروع ہوتے ہی علاقے میں رہائش پزیر لوگوں کے ساتھ ساتھ ڈرائیور حضرات اور بس اسٹینڈ کے حدود میں آنے والے دکانداروں نے خوشی کا اظہار کیا ہے۔

بس اسٹینڈ بجبہاڑہ کی ڈرائیور ایسوسی ایشن کے منتظم کا کہنا ہے کہ ’’گزشتہ 15 برسوں سے ہم 8 کنال پر محدود اسٹینڈ کی میگڈمایزیشن کی مانگ کر رہے تھے۔‘‘ انہوں نے کہا کہ ’’تارکول بچھانے سے قبل جب بھی علاقے میں تھوڑی سی بارشیں ہوتی تھیں، پورا اسٹینڈ تالاب کی شکل اختیار کر لیتا تھا، جبکہ جگہ جگہ گڑھے ہونے کی وجہ سے مسافروں، دکانداروں سمیت گاڑی چلانے والوں کو شدید دشواریوں کا سامنا کرنا پڑتا تھا۔‘‘

انہوں نے مزید کہا کہ بارشوں اور برفباری میں کیچڑ جبکہ خشک موسم میں اسٹینڈ کے چاروں اور گرد و غبار کے سبب انہیں کافی دقتیں پیش آتی تھیں۔

مقامی ڈرائیوروں نے کہا کہ 2014 کے تباہ کن سیلاب کے بعد بس اسٹینڈ میں کافی کیچڑ اور دھول جمع تھی جسے انتظامیہ نے ہٹانا آج تک گوارہ نہیں کیا۔ تاہم اسٹینڈ کی برسوں بعد میگڈمائزیشن سے اسٹینڈ کے چاروں اور رونق آگئی ہے۔

دریں اثناء ڈرائیوروں نے انتظامیہ سے بس اسٹینڈ میں بیت الخلاء تعمیر کئے جانے کا بھی مطالبہ کیا۔