فوج کی 19 راشٹریہ رائفلز کی جانب سے ’’مشن پہل‘‘ کے تحت گورنمنٹ پالی ٹیکنک کالج لارکی پوره اننت ناگ میں ایک خصوصی تقریب کا اہتمام کیا گیا جس میں مقامی نوجوانوں اور فوج نے مختلف امورات پر تبادلہ خیال کیا۔
پروگرام کے دوران 19 آر آر کے کمانڈنگ افسر کرنل دھرمیندرا یادو نے نوجوانوں کے خدشات و سوالات کے جوابات دیئے۔
پروگرام کے دوران کشمیری عوام اور فوج کے درمیان دوریاں ختم کرنے پر زور دیا گیا۔ اس موقع پر عوام خصوصا نوجوانوں کو درپیش روز مرہ کی مشکلات سے فوج کو آگاہ کیا گیا جس پر فوج نے ہر ممکن تعاون فراہم کرنے کی نوجوانوں کو یقین دہانی کرائی۔
پروگرام میں مقامی نوجوانوں نے خاصی تعداد میں شرکت کی اور فوجی افسران سے بات چیت کی۔ اس موقع پر فوج اور پولیس کے اعلیٰ افسران نے بھی شرکت کی۔
مقامی نوجوانوں نے انکاؤنٹر اور سرچ آپریشن کے دوران انٹرنیٹ خدمات معطل کیے جانے سمیت مختلف امور پر فوج کے ساتھ کھل کر بات کی۔
پروگرام کے انعقاد کے حوالے سے فوج نے کہا کہ ’’پروگرام کا مقصد نوجوانوں کو مختلف پروپیگنڈوں و افواہوں کے تناظر میں اصل تصویر اور حقائق سے روشناس کرانا ہے۔‘‘
مقامی نوجوانوں نے پروگرام کے انعقاد کا خیر مقدم کیا۔ وہیں، فوج نے مستقبل میں بھی اس طرح کے پروگرام کے انعقاد کا عندیہ دیا۔
