آنگن واڑی ہیلپرس اینڈ ورکرس ایسوسیشن سے وابستہ کئی ورکروں نے ضلع اننت ناگ کے اسپورٹس اسٹیڈیم میں پیر کو احتجاج کیا۔
احتجاج میں شامل آنگن واڑی ورکروں نے انکی نوکریاں مستقل کیے جانے کے علاوہ مراعات واگزار کرنے کی مانگ کی۔
مظاہرین نے الزام عائد کرتے ہوئے کہ سرکار و انتظامیہ ان سے برابر کام لے رہی ہے تاہم مراعات واگزار نہیں کیے جاتے۔ انہوں نے کہا: ’’انتخابات ہوں یا ناگہانی آفت ہر وقت ہم پیش پیش رہتے ہیں۔‘‘
احتجاجی مظاہرین کا کہنا تھا کہ انہیں پھر سے آئندہ ہونے والے انتخابات کے دوران ڈیوٹی دینے کے احکامات صادر کیے گئے ہیں، جبکہ امتحانی مراکز میں بھی انہیں مامور کیا گیا ہے۔ انکے مطابق وہ ان سبھی کاموں کے لیے تیار ہیں، تاہم انہیں اسکی مراعات ملنی چاہئے۔
انہوں نے مزید کہا کہ دارالحکومت دہلی سمیت کئی ریاستوں میں آنگن واڑی ورکروں کو جو مراعات دی جا رہی ہیں، وہی مراعات جموں و کشمیر کے آنگن واڑی ورکروں کو بھی ملنی چاہئے۔
