اننت ناگ: ذلنگام میں اینیمل ہسبنڈری محکمہ کی عدم موجودگی سے لوگ پریشان

جموں و کشمیر کے ضلع اننت ناگ کے کوکرناگ میں اینیمل ہسبنڈری محکمے کا قیام نہ ہونے کی وجہ سے لوگوں کو پریشانیوں کا سامنا کرنا پڑتا ہے۔ وقت پر علاج نہیں ملنے کی وجہ سے متعدد جانوروں کی موت ہوجاتی ہے۔

اننت ناگ: جموں و کشمیر کے جنوبی ضلع اننت ناگ کے حلقہ انتخاب کوکرناگ کے ذلنگام کے رہائشیوں نے کہا کہ علاقے میں اینیمل ہسبنڈری محکمہ موجود نہیں ہے۔ اس سے علاقے کی مویشی پالنے اور مویشیوں کا کاروبار کرنے والی آبادی پریشان ہے۔ وقت پر علاج نہ ملنے کے سبب مویشی مر جاتے ہیں اور لاکھوں روپے کا نقصان ہوتا ہے۔

لوگوں کا کہنا ہے کہ اینیمل ہسبنڈری محکمہ ان کے علاقے سے کئی کلومیٹر کی دوری پر واقع ہے، جہاں جانوروں کو لے جانا کافی دشوار ثابت ہوتا ہے۔ ان کا کہنا ہے کہ اکثر اوقات میں علاقے میں گاڑی بھی نہیں ملتی، جس کے ذریعے مقامی لوگ اپنے مال کو اینیمل ہسبنڈری لے جاتے ہیں۔

مقامی لوگوں کے مطابق مذکورہ علاقے میں اینیمل ہسبنڈری کے فقدان کے باعث متعدد جانوروں کی موت ہوچکی ہے۔ وقت پر ان کے مال کو علاج نہ ملنے کے باعث مختلف قسم کی بیماریوں سے ان کے جانور مر جاتے ہیں۔

لوگوں نے انتظامیہ سے گزارش کی ہے کہ وہ علاقے میں اینیمل ہسبنڈری محکمے کا قیام عمل میں لایا جائے، تاکہ لوگوں کی مشکلات کا ازالہ ممکن ہو اور ان کے مویشی بھی محفوظ رہیں۔