پہلگام میں برفباری، درجہ حرارت میں کمی

جنوبی کشمیر کے مشہور سیاحتی مقام پہلگام میں جمعرات کو تازہ برف باری کے سبب نہ صرف درجہ حرارت میں کمی واقع ہوئی ہے بلکہ لوگوں کو سخت مشکلات کا سامنا کرنا پڑ رہا ہے۔

وادئ کشمیر کے بیشتر حصوں میں رک رک بارش ہو رہی ہے جبکہ بالائی علاقوں میں ہلکی برفباری دیکھنے کو مل رہی ہے۔ ضلع اننت ناگ کے مشہور سیاحتی مقام پہلگام میں بھی ہلکی برفباری ہوئی ہے۔

ہلکی برفباری اور مسلسل بارش کے نتیجے میں درجہ حرارت میں کافی کمی واقع ہوئی ہے۔ لوگوں نے گرمی حاصل کرنے کے لیے روایتی پھرن اور کانگڑیوں کا پھر سے استعمال کرنا شروع کر دیا ہے۔

اُدھر، محکمہ موسمیات نے آئندہ 3 دنوں تک مزید بارشوں اور برفباری کی پیشگوئی کی ہے۔ محکمہ موسمیات کی پیش گوئی کے مطابق وادی کشمیر میں 16 مارچ تک موسم خراب رہنے کا امکان ہے۔

دریں اثناء ضلع گاندربل کے سونہ مرگ میں بھی تازہ برفباری کے سبب سرینگر - لیہہ شاہراہ کو ٹریفک کی آمد و رفت کے لیے معطل کر دیا گیا ہے۔