ضلع اننت ناگ کے حلقہ انتخاب بجبہاڑہ میں دیہی علاقوں میں عوام کو درپیش مشکلات کا ازالہ کرنے اور ترقیاتی پروگرامز پر عمل کرنے کے لیے انتظامیہ کی جانب سے بلاک دیوس کا اہتمام کیا گیا۔
بدھ کو ایس ڈی ایم آفس بجبہاڑہ میں بلاک دیوس کا اہتمام کیا گیا۔ پروگرام میں ایڈیشنل ڈپٹی کمشنر اننت ناگ غلام حسن شیخ کے علاوہ ایس ڈی ایم بجبہاڑہ، ڈسٹرک ڈیولپمنٹ کونسلر اور تحصیلدار بجبہاڑہ موجود تھے، جنہوں نے عوام کو درپیش مسائل کا فوری طور ازالہ کرنے کے لیے افسران کو ہدایات جاری کیں اور بعض مسائل کا موقع پر ہی نمٹارہ کیا گیا۔
اس موقع پر ایڈیشنل ڈپٹی کمشنر نے افسران کو عوامی مسائل حل کرنے کی تلقین کی ’’تاکہ عوام راحت کی سانس لے سکے۔‘‘
مزید پڑھیں؛ 'آزاد اپنی تقریر کے سیاق و سباق واضح کریں'
اس دوران مختلف گاؤں کے درجنوں وفود نے اپنے اپنے علاقوں کے مسائل سے انتظامیہ کو آگاہ کیا۔
ایڈیشنل ڈپٹی کمشنر اننت ناگ نے میڈیا سے گفتگو کرتے ہوئے کہا کہ ’’بلاک دیوس منانے کا مقصد جموں و کشمیر میں تعمیر و ترقی کی راہ کو ہموار کرنا ہے، ساتھ ہی کم سے کم وقت میں عوام کو درپیش مسائل کا ازالہ کرنا ہے۔ عوامی حلقوں کی جانب سے پیش کیے گئے مسائل کو ترجیحی بنیادوں پر حل کیا جائے گا۔‘‘
واضح رہے کہ جموں و کشمیر کی انتظامیہ کی جانب سے ہر ہفتے بدھ کے روز دیہی علاقوں میں عوام کو در پیش مسائل کا جائزہ لینے کے لئے بلاک دیوس کا اہتمام کیا جاتا ہے۔
