'میں اس جیت سے حیران ہوں'

ومبلڈن کے پہلے ہی راؤنڈ میں وینس ولیمس کو شکست دے کر گرینڈ سلیم ٹورنامنٹ سے باہر کرنے والی کوری گوف نے کہا کہ وہ اس جیت سے حیران ہیں۔

تجربہ کار امریکی کھلاڑی وینس ولیمس کو رواں برس کے تیسرے گرینڈ سلیم ومبلڈن میں خواتین کے سنگلز زمرے میں پہلے راؤنڈ میں شکست دینے کے بعد 15 سالہ کوری کوکو گوف نے کہا کہ انہوں نے کبھی نہیں سوچا تھا کہ وہ اتنی بڑی جیت درج کر پائیں گی۔

گوف نے شاندار کارکردگی کا مظاہرہ کرتے ہوئے ولیمس کو براہ راست سیٹوں میں 4-6، 4-6 سے شکست دی، دونوں کھلاڑیوں کے درمیان یہ میچ ایک گھنٹہ 19 منٹ تک چلا۔

ڈبلیوٹی اے ویب سائٹ سے بات کرتے ہوئے گوف نے بتایا کہ 'میں بہت حیران ہوں، لیکن مجھے خوشی ہے کہ ومبلڈن نے مجھے وائلڈ کارڈ دینے کا فیصلہ کیا، میرا مطلب ہے کہ میں نے کبھی نہیں سوچا تھا کہ ایسا ہو گا۔'

انہوں نے کہا کہ 'ظاہری طور پر مجھے بہترین ڈرا ملا، میں بہت خوش ہوں کہ میں ایسا کر پائی، وینس نے شاندار کارکردگی کا مظاہرہ کیا اور میچ کے دوران وہ بہت اچھا کھیل رہی تھیں اور میں جب بھی ان سے ملی ہوں انہوں نے بہت اچھا سلوک کیا ہے۔

عالمی درجہ بندی میں 313 ویں نمبر پر موجود گوف نے شروعات سے بہترین کارکردگی کا مظاہرہ کیا اور بہترین گراؤنڈ اسٹروكس لگاتے ہوئے خود سے 24 برس سینیئر اور تجربی کار کھلاڑی کو شکست دی۔

دوسرے راؤنڈ میں گوپف کا سامنا ماگدلینا رائبا ریكووا سے ہوگا جنہوں نے اپنے پہلے دور کے میچ میں آرينا سابالینكا کو شکست دی ہے۔