تریپورہ میں 18دسمبرسے لےکر 22دسمبر تکنیشنل اسکول گیمس فٹ بال انڈر 17بوائزٹورنامنٹ ‘ہونا تھالیکن آسام میں پرتشدد مظاہروں اوراگرتلا کےلئے ٹرینوں کی آمدو رفت بند ہونے کی وجہ سے ملتوی کردیا گیاہے۔
نوجوانوں کے امور اور کھیلوں کے وزیر منوج کانتی دیب نے کہا کہ اسکول گیمس فیڈریشن آف انڈیا نے اپنے ایک خط میں مطلع کیا ہے کہ موجودہ حالات کے پیش نظر متعدد ریاستیں اپنی ٹیمیں اگرتلا بھیجنے سےقاصر ہیں۔
اس لئے فیڈریشن نے ٹورنامنٹ کو اگلی تاریخ طے ہونے تک ٹورنامنٹ کو ملتوی کرنے کا فیصلہ کیا ہے۔
واضح رہے کہ پارلیمنٹ کے دونوں ایوانوں میں شہریت ترمیمی بل کے پاس ہونے کے بعد شمال مشرق خطہ میں گزشتہ کئی دنوں سے پرُتشدد مظاہرہ جاری ہے۔ مرکزی حکومت کے خلاف جاری احتجاج کے دوران اب تک چارلوگوں کی موت ہوچکی ہے۔
شمال مشرق خطہ میں مسلسل مظاہرے کی وجہ سے انڈین سپرلیگ 2019 ،آئی لیگ 20۔2019 سمیت تمام کھیل کے انعقاد ممکن نہیں ہوسکا ہے۔ شمال مشرق خطہ میں کھیل کود متاثر ہونے سے ریاستی کھیل اداروں کو بھاری نقصان کا سامنا کرنا پڑرہاہے۔
