اس سے قبل ذرائع کے مطابق ایک ویمبلے اسٹیڈیم کے ترجمان نے بتایا کہ بغیر ٹکٹ کے کچھ شائقین نے سکیورٹی کی خلاف ورزی کرکے اتوار کے روز 8 بجے سے پہلے ہی اسٹیڈیم میں رسائی حاصل کرلی۔
ٹویٹر پر میچ کے بعد جاری کردہ ایک بیان میں میٹرو پولیٹن پولیس نے کہا کہ "یورو 2020 کے فائنل کے لیے ہمارا پولیسنگ آپریشن تقریباً ختم ہوگیا ہے۔ ہزاروں شائقین کا شکریہ جن کا حوصلہ اور برتاؤ کافی اچھا تھا۔ لیکن ہم نے متعدد جرائم کی پاداش میں 49 گرفتاریاں کی ہیں۔"
میٹرو پولیٹن پولیس نے یہ بھی تصدیق کی ہے کہ شائقین کو روکنے اور انھیں کنٹرول کرنے کے دوران 19 پولیس اہلکار بھی زخمی ہوئے ہیں، یہ مکمل طور پر ناقابل قبول ہے۔
اٹلی کے خلاف یورو 2020 کے فائنل سے قبل انگلینڈ کے شائقین لندن کے لیسٹر اسکوائر میں غیر مہذب سلوک کرتے رہے۔
آن لائن منظر عام پر آنے والی ویڈیوز میں لیسٹر اسکوائر پر جمع شائقین کے ہجوم چاروں طرف بوتلیں پھینکتے ہوئے دکھائے دے رہے ہیں۔ میچ سے کئی گھنٹے قبل لوگوں کو ہوا میں رنگ اور شیشے کی بوتلیں بھی پھینکتے ہوئے دیکھا گیا۔
یہ بھی پڑھیں: EURO 2020: اٹلی کے نام یورو کپ کا خطاب، پنالٹی میں انگلینڈ کو شکست
واضح رہے کہ اتوار کے روز انگلینڈ کے ومبلے اسٹیڈیم میں کھیلے گئے یورو کپ 2020 کا فائنل میچ اضافی وقت کے بعد بھی 1-1 سے برابری پر ختم ہونے کے بعد اٹلی نے انگلینڈ کو پنالٹی میں 2-3 سے شکست دے کر اپنا دوسرا یوروپی چمپیئن شپ ٹائٹل اپنے نام کرلیا۔
مقررہ وقت میں ایک ایک گول سے میچ برابر ہونے کے سبب میچ کو فیصلہ کن بنانے کے لیے 30 منٹ کا اضافی وقت دیا گیا۔ مگر اضافی وقت میں بھی کوئی ٹیم گول نہ کرسکی جس کے بعد یورو کپ چمپیئن شپ کا فیصلہ پنالٹی ککس پر کیا گیا جس میں اٹلی نے دو کے مقابلے میں تین گول کیے۔
