چنئی: راجستھان رائلز کے تجربہ کار آف اسپنر روی چندرن اشون نے کہا کہ اس سال انڈین پریمیئر لیگ (آئی پی ایل) میں امپائرنگ کے کچھ فیصلے چونکا دینے والے ہیں۔
اشون بدھ کی رات یہاں چار بار کی چمپئن چنئی سپر کنگز کے خلاف تین رن کی سنسنی خیز جیت کے بعد ایک پریس کانفرنس میں امپائروں کے غلط فیصلہ سازی کے خلاف سختی سے سامنے آئے۔ انہوں نے یہ سوال بھی کیا کہ چنئی کی اننگز کے دوران ان کی ٹیم کی درخواست کے بغیر گیند کیوں تبدیل کی گئی۔اشون نے کہا، "میں کافی حیران ہوں کہ امپائر نے خود ہی اوس کی وجہ سے گیند کو تبدیل کیا۔ ایسا پہلے کبھی نہیں ہوا اور میں کافی حیران ہوں۔ سچ پوچھیں تو اس سال کے آئی پی ایل میں کچھ فیصلوں نے مجھے قدرے حیرت میں ڈال دیا۔ "
انھوں نے کہا کہ 'ہم بحیثیت گیندبازی ٹیم آپ سے گیند تبدیل کرنے کے لیے نہیں کہہ رہے ہیں، لیکن امپائر کے اشارے پر گیند کو تبدیل کیا گیا، جب میں نے امپائر سے وجہ پوچھی تو انھوں نے کہا کہ وہ اسے تبدیل کر سکتے ہیں، مجھے امید ہے ہر بار اوس پڑنے پر وہ گیند کو بدلیں گے۔ آپ جو چاہے کریں لیکن معیار ہر جگہ ایک جیسا رکھو۔"
اہم بات یہ ہے کہ شیوم دوبے کے گرنے کے بعد امپائروں نے گیند کو تبدیل کر دیا تھا، جبکہ چنئی کا اسکور 12 اوور میں 92/3 تھا۔ مہندر سنگھ دھونی اور رویندرا جڈیجہ نے آخری اووروں میں تیز رن بنائے لیکن چنئی 176 رن کے ہدف کا تعاقب کرتے ہوئے تین رن سے شکست کھا گئی۔
کرکٹ کے قوانین اور آئی پی ایل کے کھیل کے حالات دونوں امپائروں کو گیند کو تبدیل کرنے کی اجازت دیتے ہیں۔ قانون 4.5 اور پلیئنگ کنڈیشن 4.4 کے مطابق "اگر، کھیل کے دوران، گیند کو نہیں پایا جا سکتا یا دوبارہ حاصل نہیں کیا جا سکتا ہے یا امپائر اس بات پر متفق ہیں کہ یہ عام استعمال کے ذریعے کھیلنے کے لیے غیر موزوں ہو گئی ہے، تو امپائر گیند کو اس کی طرح ملتی جلتی گیند کے ساتھ تبدیل کر سکتے ہیں۔ گیند کو تبدیل کرنے پر امپائر بلے بازوں اور فیلڈنگ کپتان کو مطلع کرے گا۔"
اشون اس سیزن میں امپائرنگ کے فیصلوں پر سوال اٹھانے والے پہلے کھلاڑی نہیں ہیں۔ 5 اپریل کو پنجاب کنگز کے سیم کیرن نے بھی امپائر کے فیصلوں میں بے ضابطگیوں پر اعتراض کیا تھا۔
کیرن نے کہا کہ مجھے یہ قدرے عجیب لگا کہ انہوں نے پہلی اننگز میں گیند کو اس وقت تبدیل کیا جب وہ تھوڑی گیلی تھی۔ میں اپنی گیند کو تبدیل کرنے کی کوشش کر رہا تھا کیونکہ یہ صابن بن گئی تھی لیکن مجھے سمجھ نہیں آیا کہ انہوں نے مجھے گیند کیوں نہیں بدلنے دی؟"
اشون نے تیز گیند باز سندیپ شرما کی بھی تعریف کی، جنہوں نے دھونی کے مسلسل دو چھکے لگانے کے باوجود آخری اوور میں 21 رن کا دفاع کرنے کے لیے زبردست حوصلہ دکھایا۔ اشون نے کہا، "سندیپ کی کارکردگی غیرمعمولی تھی۔ میں نے اس کے مزاج سے واقعی لطف اٹھایا۔" یواین آئی۔
