آئی پی ایل فرنچائزی راجستھان رائلز نے ٹویٹر کے ذریعہ اطلاع دی کہ ان کے تیز گیند باز اینڈیو ٹائی ذاتی وجوہات کی بنا پر وطن لوٹ گئے ہیں اور اب وہ لیگ کے بقیہ میچ نہیں کھیلیں گے۔
بین اسٹوکس اور لیام لیگونسٹون کے بعد اینڈریو ٹائی راجستھان رائلز کے تیسرے ایسے غیر ملکی کھلاڑی بنے جو ٹورنامنٹ کو درمیان میں ہی چھوڑ کر وطن واپس ہوگئے ہیں۔
اس سے قبل بین اسٹوکس انگلی کی چوٹ کے سبب اور لیگونسٹون بائیو ببل میں تھکان محسوس ہونے کا حوالہ دے کر انگلینڈ لوٹے تھے۔ راجستھان رائلز پہلے ہی اپنے بہتر کھلاڑی اور گزشتہ سیزن کے موسٹ ویلیوایبل کھلاڑی (ایم وی پی) جوفر آرچر کے بغیر کھیل رہی ہے جو ٹورنامنٹ سے باہر ہوگئے ہیں۔
واضح رہے کہ آئی پی ایل 2018 میں پرپل کیپ فاتح(سب سے زیادہ وکٹ لینے والے) ٹائی راجستھان کے اب تک کے پانچ میں سے کسی بھی مقابلے میں الیون میں شامل نہیں تھے۔ انہوں نے گزشتہ سیزن میں بھی صرف ایک میچ کھیلا تھا۔
راجستھان کے پاس فی الوقت غیر ملکی کوٹے میں صرف جوز بٹلر، کرس مورس، ڈیوڈ ملر اور مستفیض الرحمن ہی انتخاب کے لیے دستیاب ہیں۔
