دبئی: کرکٹ کے مداحوں کے لیے بھارت پاکستان کے درمیان مقابلہ ہمیشہ سے دلچسپی سے بھرپور رہا ہے اور جب ایشیا کپ جیسے کسی بڑے ایونٹ میں دونوں ٹیمیں آمنے سامنے ہوں تو شائقین کی توجہ مزید بڑھ جاتی ہے۔ ایشیا کپ 2022 میں دونوں ٹیمیں اتوار مدمقابل ہوں گی اور اس کے لیے دونوں ٹیمیں اپنی تیاریوں کو حتمی شکل دے رہی ہیں جبکہ اسی دوران حریف ٹیموں کے کھلاڑیوں کی ایک دوسرے کے لیے نیک خواہشات اور مسکراہٹوں کے تبادلوں کی ویڈیوز بھی سامنے آرہی ہیں۔
ہند و پاک کرکٹ مقابلہ نہ صرف دونوں ٹیموں کے کھلاڑیوں کے لیے اعصاب کا مقابلہ ہوتا ہے بلکہ دونوں ٹیموں کے مداح بھی ایک ایک لمحے دباؤ میں رہتے ہیں۔پاکستان کرکٹ بورڈ (پی سی بی) نے ایشیا کپ 2022 کے کل کے اہم میچ سے قبل ٹویٹر پر قومی ٹیم کے کپتان بابراعظم اور ہندوستانی ٹیم کے کپتان روہت شرما کی ویڈیو جاری کی ہے، جس میں دیکھا جاسکتا ہے کہ دونوں اسٹار بلے باز اسٹیڈیم میں موجود ہیں اور خوش گپیوں میں مصروف ہیں۔
بابراعظم اور روہت شرما Babar Azam and Rohit Sharma کو مسکراہٹوں کا تبادلہ کرتے ہوئے دیکھا جاسکتا ہے تاہم دونوں آپس میں کیا بات کر رہے ہیں واضح نہیں ہورہا ہے لیکن انہیں کہیں اردو میں بات کرتے ہوئے سنا جاسکتا ہے۔ پی سی بی نے اس سے قبل بھی ایک ویڈیو جاری کی تھی، جس میں ہندوستانی کھلاڑی قومی ٹیم کے فاسٹ باؤلر شاہین شاہ آفریدی کی جلد صحت یابی کے لیے نیک خواہشات کا اظہار کر رہے تھے۔
بھارتی ٹیم کے اسٹار بلے باز ویراٹ کوہلی نے شاہین آفریدی سے ان کی انجری کے بارے میں پوچھا تو شاہین نے بھی ان کی فارم میں جلد واپسی کے لیے دعا کی۔کوہلی نے شاہین شاہ آفریدی کا شکریہ بھی ادا کیا۔ اس کے علاوہ ہندوستان کے دیگر کھلاڑیوں نے بھی گراؤنڈ میں موجود شاہین آفریدی سے ملاقات کی اور ان سے انجری کے بارےمیں دریافت کیا، جن میں لیگ اسپنر یوزویندر سنگھ چاہل بھی شامل تھے۔ اس موقع پر سری لنکا کے کھلاڑیوں کی قومی ٹیم کے مختلف کھلاڑیوں سے ملاقات بھی دکھائی گئی جہاں وہ آپس میں تبادلہ خیال کر رہے ہیں۔
ایشیا کپ کے لیے پاکستان کی تیاریوں کو اس وقت دھچکا لگا تھا جب فاسٹ باؤلر شاہین شاہ آفریدی انجری کے باعث ایونٹ سے باہر ہوگئے تھے Shaheen Afridi Out due to Injury اور ان کی جگہ نسیم شاہ کو شامل کیا گیا، جس کے بعد محمد وسیم بھی انجری کا شکار ہوئے تاہم ان کے متبادل کے طور پر تجربہ کار حسن علی کو طلب کیا گیا ہے۔ دوسری جانب ہندوستان نے طویل عرصے سے آؤٹ آف فارم اسٹار بلے باز ویراٹ کوہلی کو دوبارہ ٹیم میں شامل کرلیا ہے اور ٹیم متحدہ عرب امارات میں پاکستان کے خلاف بڑے میچ کی تیاریوں میں مصروف ہے۔
ایشیا کپ کرکٹ ٹورنامنٹ 2022 میں روایتی حریف پاکستان اور بھارت کی ٹیموں کا بڑا مقابلہ 28 اگست (کل) کو دبئی میں ہوگا اور پاکستانی وقت کے مطابق شام کو 7 بجے شروع ہوگا۔ ٹورنامنٹ کا ابتدائی میچ افغانستان اور سری لنکا کے درمیان کھیلا جارہا ہے۔ ایشیا کپ کے لیے 6 ٹیموں کو دو گروپس میں تقسیم کیا گیا ہے جہاں گروپ اے میں ہندوستان ، پاکستان اور ہانگ کانگ جبکہ گروپ بی میں سری لنکا، بنگلہ دیش اور افغانستان کی ٹیمیں شامل ہیں۔
یو این آئی
