نئی دہلی: بھارتی کرکٹ ٹیم کے نائب کپتان ہاردک پانڈیا آئی سی سی کرکٹ ورلڈ کپ کے اگلے دو میچوں میں بھی شرکت نہیں کریں گے، کیونکہ پانڈیا ٹخنے کی چوٹ سے ابھی بھی مکمل طور پر صحت یاب نہیں ہوسکے ہیں۔ بھارت کا اگلا مقابلہ دفاعی چیمپئن انگلینڈ سے 29 اکتوبر کو لکھنؤ میں ہونا ہے اور اس کے بعد سری لنکا سے 2 نومبر کو ممبئی میں کھیلنا ہے۔ ذرائع کے مطابق پانڈیا کے لکھنؤ میں انگلینڈ کے خلاف میچ سے قبل ٹیم میں شامل ہونے کا امکان نہیں ہے۔
دراصل پونے کے ایم سی اے اسٹیڈیم میں بنگلہ دیش کے خلاف بھارت کے چوتھے لیگ میچ کے دوران ہاردک اپنی ہی گیند بازی پر فیلڈنگ کرتے ہوئے زخمی ہوگئے تھے جس کے بعد وہ میدان سے باہر چلے گئے اور باقی میچ نہیں کھیلا۔ جس کے نتیجے میں پانڈیا 22 اکتوبر کو نیوزی لینڈ کے خلاف کھیلے گئے میچ میں بھارتی ٹیم کا حصہ نہیں تھے۔
میڈیا رپورٹ کے مطابق آل راؤنڈر ہاردک پانڈیا جنوبی افریقہ (5 نومبر) اور نیدرلینڈز (12 نومبر) کے خلاف آخری دو لیگ میچوں کے لیے دستیاب ہوں گے۔ کیونکہ این سی اے میں میڈیکل ٹیم اس کے صحت یاب ہونے کے لیے مزید کچھ دن انتظار کرے گی۔ ٹیم انتظامیہ آل راؤنڈر کے ساتھ جلدی نہیں کرنا چاہتی کیونکہ وہ ہاردک کو سیمی فائنل کے لیے مکمل فٹ دیکھنا چاہتے ہیں۔
یہ بھی پڑھیں:
- گیندبازی کرتے وقت ہاردک پانڈیا ہوئے زخمی، ویراٹ کوہلی نے اوور مکمل کیا
- زخمی ہاردک پانڈیا نیوزی لینڈ کے خلاف میچ سے باہر
واضح رہے کہ بھارت واحد ایسی ٹیم ہے جس نے اپنے پانچوں میچ جیت کر پوائنٹس ٹیبل میں سرفہرست ہے اور اسے اب سیمی فائنل میں جگہ کنفرم کرنے کے لیے باقی چار میچز میں سے صرف دو ہی میچ جیتنے ہوں گے۔ دو بار کی چیمپیئن بھارت کا اگلا مقابلہ دفاعی چمپیئن انگلینڈ سے ہوگا۔ جسے ناک آؤٹ مرحلے تک پہنچنے کے لیے کم از کم چار اور ممکنہ طور پر اپنے باقی تمام پانچ میچ جیتنے ہوں گے۔
