بنگلورو:ہاکی انڈیا کے ساتھ بات چیت میں ہاردک نے کہاکہ پہلی بار جب ہمیں یوگا سے متعارف کرایا گیا، ہم نے محسوس کیا کہ یہ اتنا فائدہ مند نہیں ہے اور ہمارے لئے تمام آسنوں کو صحیح طریقے سے کرنا آسان نہیں ہے۔ ہم میں سے بہت سے لوگ جم میں ایک گھنٹہ یوگا کرنا مناسب سمجھتے تھے، لیکن آخر کار ہمیں معلوم ہوا کہ یوگا پریکٹس نے توجہ کی طاقت کو بڑھانے میں زبردست مدد کی ہے۔
انہوں نے کہاکہ آج یوگا ہماری زندگی کا ایک لازمی حصہ بن گیا ہے۔ ذاتی طور پر اس سے مجھے بہتر توجہ مرکوز کرنے میں مدد ملتی ہے اور خاص طور پر ورلڈ کپ کے دوران جو چوٹ لگی تھی اس کے بعد یوگا نے مجھے صحت یاب ہونے میں مدد کی۔ میں یوگا سیشن کے بعد بہت زیادہ پر سکون محسوس کرتا ہوں اور اس سے ہمیں بہتر توجہ مرکوز کرنے میں بھی مدد ملی ہے۔
دوسری طرف ہندوستانی خواتین ہاکی ٹیم کی نائب کپتان نونیت کور نے لوگوں سے درخواست کی کہ وہ اپنی مجموعی صحت کے لیے یوگا کریں۔کور نے کہاکہ یوگا ہمارے ہفتہ وار معمول کا ایک حصہ ہے اور اس نے ہمارے تناؤ کو سنبھالنے میں بہت مدد کی ہے۔ یہ ہمارے جسم کو خاص طور پر بھاری سیشن کے بعد آرام دیتا ہے اور بعض آسن ہماری لچک کو بڑھانے میں مدد کرتے ہیں۔
یہ بھی پڑھیں:Emerging Asia Cup 2023 ٹیم انڈیا نے فائنل میں بنگلہ دیش کو شکست دے کر ایشیا کپ کا خطاب جیتا
ہندوستانی خواتین کی ہاکی ٹیم اس وقت اسپین کے دورے سے قبل قومی کوچنگ کیمپ کے لیے یہاں اسپورٹس اتھارٹی آف انڈیا (ایس اے آئی) کے مرکز میں ہے، جب کہ مردوں کی ٹیم یورپ میں اپنی پرو لیگ مہم کے بعد دو ہفتے کے وقفے پر ہے۔ چین میں ہونے والے ایشین گیمز سے قبل اگلے چند ماہ دونوں ٹیموں کے لیے بہت اہم ہیں کیونکہ وہ اپنی اپنی کیٹیگریز میں گولڈ میڈل جیت کر 2024 کے پیرس اولمپک گیمز کے لیے براہ راست کوالیفائی کرنے کی کوشش کریں گی۔
یواین آئی
