بھارت اور سری لنکا کے درمیان تین ون ڈے میچوں کی سیریز کا آغاز آج سے شروع ہو رہا ہے۔ دونوں ٹیموں کے درمیان پہلا ون ڈے کولمبو کے پریماداسا اسٹیڈیم میں کھیلا جائے گا۔ یہ میچ سہ پہر 3 بجے سے کھیلا جائے گا۔
اس میچ میں بھارتی ٹیم کے تجربہ کار بلے باز شیکھر دھون کپتان جبکہ تیز گیند باز بھونیشور کمار نائب کپتان ہوں گے۔
سری لنکا کے دورے پر پہنچنے والی بھارتی ٹیم میں بہت سارے نوجوان کھلاڑی شامل ہیں، جنھیں ڈیبیو کرنے کا موقع مل سکتا ہے اور بہت سے ایسے کھلاڑی ہیں جن کی کارکردگی ٹیم میں ان کی گرفت مضبوط کرے گی۔
کپتان دھون اننگز کی آغاز کرتے نظر آئیں گے حالانکہ ان کا ساتھی کون ہوگا یہ ایک بڑا سوال ہے۔ سری لنکا کا دورہ کرنے والی بھارتی ٹیم میں دیودت پڈککل، پرتھوی شا، ریتوراج گائکوڑ اور نتیش رانا جیسے اوپنر موجود ہیں۔ دھون کے ساتھ اننگز کی شروعات کرنے کے لئے ان چار بلے بازوں میں مقابلہ ہے۔
حالیہ فارم اور بین الاقوامی تجربے کو دیکھے تو پرتھوی شا، دیودت پڈککل، نتیش رانا اور گائکواڈ سے آگے ہیں۔ انہوں نے آئی پی ایل 14 اور وجے ہزارے ٹرافی میں شاندار بلے بازی کی۔
اس کے علاوہ وکٹ کیپر کا انتخاب کرنا بھی ٹیم مینجمنٹ کے لئے مشکل ہے۔ انہیں سنجو سیمسن اور ایشان کشن کے درمیان انتخاب کرنا پڑے گا۔
اگر مینجمنٹ بیٹنگ کو مدنظر رکھتے ہوئے وکٹ کیپر کا انتخاب کرتی ہے تو ایشان کشن کو موقع مل سکتا ہے۔ انہوں نے انگلینڈ کے خلاف سیریز میں ڈیبیو کیا اور شاندار بیٹنگ بھی کی۔
یہ بھی پڑھیں: پاکستان نے انگلینڈ کو پہلے ٹی ٹوئنٹی میں شکست دی
دھون اور شا کے بعد سوریا کمار یادو کو تیسرے نمبر پر بھیجا جاسکتا ہے۔ سوریا کمار یادو کے بین الاقوامی کیریئر کا آغاز بہت اچھا رہا۔ وہیں چوتھے نمبر پر منیش پانڈے کو بھیجا جا سکتا ہے۔ اس کے بعد آل راؤنڈر ہاردک پانڈیا اور کرونال پانڈیا بیٹنگ کے لئے آسکتے ہیں۔
گیند بازی میں بھونیشور کمار، کلدیپ یادو، یوزویندر چہل کو منتخب کیا جانا طے ہے۔ ٹیم میں دوسرے پیسر کے کردار کے لئے نویدیپ سینی اور دیپک چاہر کے مابین مقابلہ ہے۔
