تیسرے دن کا کھیل کا آغاز انگلینڈ کی اننگ سے ہوا لیکن انگلینڈ ٹیم زیادہ دیر نہیں کھیل سکی اور 578 رنز پر آؤٹ ہوگئی۔ اس کے بعد بھارتی ٹیم نے محتاط انداز میں کھیلنا شروع کیا۔
بھارت کی جانب سے روہت شرما اور شبھمن گل نے اننگ کی شروعات کی لیکن روہت 9 گیندوں میں محض 6 رنز بنا کر 19 رنز کے مجموعی اسکور پر پویلین لوٹ گئے۔ اس کے بعد چیتیشور پجارا کریز پر آئے اور اپنے روایتی انداز میں کھیلنا شروع کیا۔
اس دوران شبھمن گل بھی 29 رنز بنا کر آؤٹ ہوئے جبکہ وراٹ کوہلی اور اجنکیا رہانے بالترتیب 11 اور ایک رنز بنا کر جلدی جلدی پویلین لوٹ گئے اور ٹیم بحران کا شکار ہوگئی۔
محض 73 رنز پر 4 وکٹیں گنوانے کے بعد سب کی نظریں چیتیشور پجارا اور رشبھ پنت پر ٹکی ہوئی تھیں اور ان دونوں کھلاڑیوں نے بہترین بلے بازی کا مظاہرہ کیا اور ٹیم کو ابتدائی بحران سے نکالا۔
پجارا اور پنت نے پانچویں وکٹ کےلیے 119 رنز کی کار آمد پارٹنرشپ نبھائی، اس دوران پجارا 73 رنز بنا کر آؤٹ ہوگئے جبکہ رشبھ پنت نے تیزی سے رنز بنائے۔
ٹیم کو بحران سے نکالنے کے بعد رشبھ پنت تیزی سے سنچری کی جانب بڑھ رہے تھے لیکن بدقسمتی سے وہ سنچری بنانے سے محروم ہوگئے۔ پنت نے 88 گیندوں میں 9 چوکوں اور 5 چھکوں کی مدد سے 91 رنز کی اننگ کھیلی۔
پجارا اور پنت کے آؤٹ ہونے بعد ٹیم کی امیدوں کو جھٹکا لگا لیکن واشنگٹن سندر اور روی چندرن اشون نے ٹیم مزید کسی نقصان سے محفوظ رکھا۔
تیسرے دن کا کھیل ختم ہونے تک واشنگٹن سندر 33 رنز اور اشون 8 رنز بنا کر کریز پر موجود ہیں۔
انگلینڈ کی جانب سے ڈومنِک بیس نے چار کھلاڑیوں کو پویلین کی راہ دکھائی جبکہ جوفرا آرچر نے 2 وکٹیں حاصل کیں۔
