انگلینڈ کرکٹر جو روٹ نے کہا کہ پاکستان کی وکٹیں فلیٹ اور انگلینڈ سے مختلف ہیں جس پر بلے بازی کرنا وہ پسند کریں گے لیکن پاکستان دورے کا فیصلہ کرنا ان کا اختیار نہیں لیکن جب بھی ہوگا انہیں ذاتی طور پر پاکستانی جانا پسند ہوگا۔
ساؤتھمپٹن سے آن لائن پریس کانفرنس کےدوران انگلش ٹیسٹ ٹیم کے کپتان نے کہا کہ 'پاکستان ایک اچھا ملک ہے، وہاں جب ٹیسٹ کرکٹ واپس آئی تھی تو عوام کے جذبات دیکھنے لائق تھے،انہوں نے کھلاڑیوں سے بھی پوچھا تھا کہ پاکستان میں دوبارہ کھیل کر کیسا لگا، سب کا یہی کہنا تھا کہ کافی مثبت محسوس ہوا۔
واضح رہے کہ انگلینڈ کرکٹ ٹیم نے سنہ 2005 کے بعد سے پاکستان کا دورہ نہیں کیا تاہم کورونا وائرس صورتحال میں مشکل حالات کے باوجود پاکستان نے انگلینڈ ٹیم کا اس سال دورہ کیا جس کے بعد پی سی بی کے سی ای او وسیم خان اور سابق کپتان وسیم اکرم دونوں نے ہی کہا کہ انگلینڈ کو پاکستان کا جوابی دورہ کرنا چاہئے۔
انگلش کرکٹ ٹیم کو شیڈول کے مطابق 2022 میں پاکستان کا دورہ کرنا ہے اور پی سی بی اس دورے سے قبل انگلینڈ کے خلاف ایک مختصر سیریز کی میزبانی کا بھی خواہشمند ہے۔
