ممبئی میں واقع بی سی سی آئی کے ہیڈ آفس میں آج بھارتی کرکٹ ٹیم کے ہیڈ کوچ کے لیے انٹریو ہوا جس میں چھ امیدواروں کا انٹرویو لیا گیا۔
انٹرویو دینے والوں میں بھارت سے رابن سنگھ، لال چند راجپوت اور روی شاستری جبکہ نیوزی لینڈ کے مائیک ہیسن، آسٹریلیا کے ٹام موڈی اور ویسٹ انڈیز کے فل سمنس شامل تھے۔
روی شاستری فی الحال ویسٹ انڈیز دورے پر ٹیم کے ساتھ ہیں جس کے مدنظر ویڈیو کانفرسنگ کے ذریعے ان کا انٹرویو ہوا۔
انٹرویو کے اختتام پر کپل دیو کی قیادت والی تین رکنی کمیٹی نے موجودہ کوچ روی شاستری کو ایک بار پھر سے ٹیم کی ذمہ داری دے کر ان کے نام پر مہر لگائی۔
نو منتخب کوچ روی شاستری کی میعاد سنہ 2021 میں ہونے والے ٹی 20 عالمی کپ تک ہوگی۔
واضح رہے کہ ہیڈ کوچ روی شاستری سمیت ٹیم کے معاون اسٹاف کی میعاد عالمی کپ کے بعد مکمل ہوگئی تھی لیکن ویسٹ انڈیز دورے کے لیے ان کے عہدے میں میعاد میں 45 دنوں کی توسیع کی گئی ہے۔
حالاںکہ اس سے قبل قیاس آرائی جاری تھی کہ روی شاستری کو دوبارہ ہیڈ کوچ کی ذمہ داری سوںپی جائے گی جبکہ کپتان وراٹ کوہلی نے بھی شاستری کی حمایت کی تھی جس پر بی سی سی آئی کی کرکٹ ایڈوائزری کمیٹی نے مہر ثبت کی۔
روی شاستری نے سنہ 2017 میں کوچ کا عہدہ سنبھالا تھا اور ان کی قیادت میں بھارتی ٹیم نے شاندار کار کردگی کا مظاہرہ کیا، شاستری کی قیادت میں ٹیم نے 21 ٹیسٹ میچز کھیلے ہیں جس میں 13 میں جیت درج کی ہے اس کے علاوہ 60 یک روزہ میچوں میں 43 اور 36 ٹی 20 میچوں میں 25 میں جیت کا پرچم لہرایا ہے۔
اس کے علاوہ شاستری کی قیادت میں بھارتی ٹیم کئی مرتبہ آئی سی سی ٹیسٹ درجہ میں پہلا مقام حاصل کی ہے جبکہ تاریخ میں پہلی بار ٹیم نے آسٹریلیا کو اسی کی سرزمین شکست دی تھی۔
ٹیم فی الحال ویست انڈیز دورے پر ہے جہاں اس نے ٹی 20 اور یک روزہ سیریز میں کیریبیئن ٹیم کو شکست دی اور یہی کارکردگی شاستری کے لیے اہم ثابت ہوئی۔
جانیے ان چھ امیدواروں کے نام اور ان کا کرکٹ کرئیر:
روی شاستری (بھارت): عمر 57 برس، 80 ٹیسٹ اور 150 یک روزہ میچ
ٹام موڈی(آسٹریلیا): عمر 53 برس، 8 ٹیسٹ اور 76 یک روزہ میچ
مائیک ہیسن(نیوزی لینڈ): عمر 44 برس، بطور کھلاڑی بین الاقوامی کرکٹ کا کوئی تجربہ نہیں
فل سمنس(ویسٹ انڈیز): عمر 56 برس، 26 ٹیسٹ، 143 یک روزہ میچ
لال چند راجپوت(بھارت): عمر 57 برس، دو ٹیسٹ، 4 یک روزہ میچ
رابن سنگھ(بھارت): عمر 55 برس، ایک ٹیسٹ، 136 یک روزہ میچ
