عالمی کپ کے سیمی فائنل میں بھارت کو نیوزی لینڈ کے ہاتھوں 18 رنز سے شکست ہوئی اسی کے ساتھ بھارت کا تیسری مرتبہ عالمی کپ جیتنے کا خواب ادھورا رہ گیا۔
مودی نے ٹویٹ میں لکھا کہ 'سیمی فائنل میچ کا نتیجہ مایوس کن رہا لیکن ٹیم نے آخر تک کوششیں کیں یہ دیکھ کر اچھا لگا اور ٹیم نے پورے ٹورنامنٹ میں گیند بازی، بلے بازی اور فیلڈنگ میں بہتر کارکردگی کا مظاہرہ کیا۔
اسی کے ساتھ ہی مودی نے لکھا کہ جیت اور ہار کھیل کا حصہ ہے، انہوں نے مستقبل کے لیے ٹیم کو نیک خواہشات سے بھی نوازا۔
اس کے علاوہ کانگریس پارٹی کے رہنما راہل گاندھی نے بھی ٹویٹ کے ذریعے بھارتی ٹیم کی کارکردگی کی سراہنا کی۔
انہوں نے لکھا کہ آج کی رات کروڑوں لوگوں کے دل ٹوٹے ہوں گے لیکن بھارتی ٹیم نے اچھی کوشش کی اسی لیے ٹیم عزت اور ہمارے پیار کی حقدار ہے۔
اسی کے ساتھ راہل نے نیوزی لینڈ کو جیت کی مبارکباد دی اور لکھا کہ 'نیوزی لینڈ نے بھی بہتر کارکردگی کا مظاہرہ کیا اور فائنل میں جگہ بنائی۔ْ
واضح رہے کہ بھارتی ٹیم کو لگاتار دوسری مرتبہ عالمی کپ سیمی فائنل میں شکست کا سامنا کرنا پڑا ہے، اس سے قبل سنہ 2015 میں آسٹریلیا اور نیوزی لینڈ کی مشترکہ میزبانی میں منعقد ہونے والے عالمی کپ کے سیمی فائنل میں بھارت کو آسٹریلیا کے ہاتھوں شکست ہوئی تھی۔
