سابق کپتان مہندر سنگھ دھونی نے آئندہ ماہ ویسٹ انڈیز دورے کے لیے خود الگ کر لیا ہے۔
اس بارے میں ٹیری ٹوریل آرمی کے لیفٹیننٹ کرنل نے بتایا کہ دھونی اگلے دو مہینوں کے لیے ان کے ریجمینٹ کا حصہ ہوں گے، جبکہ بی سی سی آئی افسر نے بھی اس بات کی تصدیق کی ہے۔
بی سی سی آئی افسر نے کہا کہ دھونی دو ماہ پیراملٹری ریجمینٹ میں گزاریں گے۔
واضح رہے کہ اتوار کو بی سی سی آئی کے ساتھ ہونے والی میٹنگ سے قبل ہی دھونی نے اپنا فیصلہ سنا دیا ہے، ساتھ ہی کرکٹ بورڈ کی جانب سے یہ بات بھی واضح کی گئی کہ دھونی ریٹائرمنٹ نہیں لے رہے ہیں۔
بی سی سی آئی افسر نے کہا کہ ہم تین باتیں ہر کسی کے گوش گزار کرنا چاہتے ہیں۔
پہلی یہ کہ دھونی ریٹائرمنٹ نہیں لے رہے ہیں، دوسری دھونی پیرا ملٹری ریجمینٹ میں دو ماہ کا وقت گزاریں گے جبکہ تیسری یہ کہ ہم نے دھونی کا یہ فیصلہ سلیکشن کمیٹی اور کپتان وراٹ کوہلی کو بتا دیا ہے۔
ونڈیز دورے پر دھونی کی عدم دستیابی کی وجہ سے قیاس لگایا جا رہا ہے کہ وکٹ کیپر کے لیے یک روزہ اور ٹی 20 کے لیے رشبھ پنت کو جبکہ ٹیسٹ میں ردھیمان ساہا کو ٹیم میں شامل کیا جا سکتا ہے۔
واضح رہے کہ حال ہی میں اختتام پذیر عالمی کپ میں سست رفتار اننگز کی وجہ سے دھونی کافی تنقیدوں کا شکار ہوئے تھے اور ان کے ریٹائرمنٹ کی خبریں گشت کر رہی تھیں لیکن بی سی سی آئی نے دھونی کے ریٹائرمنٹ کی باتوں کو خارج کر دیا ہے۔
