آئی پی ایل فرینچائزیز نے لندن میں منعقد میٹنگ میں اس بات کر بحث کی کہ آئی پی ایل کی تمام ٹیموں کو ایک یونین بنانا چاہیے جو بھارتی کرکٹ بورڈ کے مساوی آئی پی ایل سے متعلق تمام فیصلے کی صلاحیت رکھتی ہے۔
حالاںکہ دو ٹیم مالکان نے ایسا کرنے سے انکار کردیا ہے۔
تفصیلات کے مطابق آئی پی ایل کے شروعاتی سیزن سے بی سی سی آئی کے ساتھ منسلک ایک ٹیم کے مالک نے کہا کہ ہم سب کو ایک ہو جانا چاہئے اور ایک یونین بنا لینی چاہئے، لیکن چینئی سپر کنگز اور ممبئی انڈینز نے اس طرح کی کسی بھی یونین بنانے سے انکار کر دیا۔
واضح رہے کہ دو روز قبل یہ خبر آئی تھی کہ اس میٹنگ میں آئی پی ایل میں ٹیموں کی تعداد بڑھانے کی بات ہوگی۔
لندن میں ہوئی میٹنگ میں حصہ لینے والی ٹیم کے ایک افسر نے بتایا کہ ہم نے ٹیموں کی تعداد میں اضافہ کے لیے جو بحث کی ہے وہ غیر رسمی تھی اور اس معاملے پر فیصلہ لینے کا حق بی سی سی آئی کو ہے۔
جبکہ ایک دیگر افسر نے بھی اجلاس میں آئی پی ایل کی توسیع پر بحث کی تصدیق کی۔
انہوں نے کہا کہ یونین بنانے کے معاملے پر بحث ہوئی تھی لیکن یہ غیر رسمی تھی اور اس معاملے پر کس طرح آگے بڑھا جائے اس کی کوئی ٹھوس منصوبہ بندی نہیں ہے، زیادہ ٹیموں کا مطلب ہے کہ زیادہ میچ ہوں گے یعنی ٹورنامنٹ بھی طویل وقت چلے گا۔
